Papa, bashkësive bazë të Brazilit: jemi të thirrur ta ungjillëzojmë botën e të hyjmë
në dialog me të
“Ungjillëzimi është detyrë e gjithë Kishës, e krejt Popullit të Zotit”: kështu shkruan
Papa Françesku në mesazhin e tij për Takimin XIII kombëtar të Bashkësive kishtare
bazë në Brazil, që filloi sot në Huazeiro do Norte. Tema e takimit, i cili do të përfundojë
më 11 janar, është “Drejtësia dhe profecia, në shërbim të jetës”. Papa nënvizon se
të gjithë duhet të jemi shtegtarë, si në fshat ashtu edhe në qytet, duke i çuar gëzimin
e Ungjillit çdo burri e çdo gruaje. Ati i Shenjtë ia beson pjesëmarrësit mbrojtjes
së Zojës së Aparesidës dhe nënvizon rolin e rëndësishëm të bashkësive bazë në misionin
ungjillëzues të Kishës. Duke cituar “Evangelii Gaudium”, Papa i këshillon bashkësitë
të mos e humbasin lidhjen me famullinë e të integrohen mirë në baritorinë e Kishës
së vendit. Ati i Shenjtë e mbyll mesazhin me fjalët e Shën Palit Apostull drejtuar
korintasve: “I mjeri unë po të mos predikoja Ungjillin”.