Ngjarja e mishërimit të Fjalës është zbulimi i përsosur
dhe i patejkalueshëm i misterit të Hyjit. Në “historinë e Fjalës” njeriu mund të shohë
lavdinë e Hyjit dhe, kështu, njeriu merr jetën e amshuar, edhe pse ende jeton në kohë. Shestimi
i mistershëm i Hyjit për njerëzimin zbulohet plotësisht me mishërimin: atij, që e
pranon Fjalën e mishëruar, i jepet pushteti për t’u bërë bir i Hyjit. Njeriu është
i thirrur për t’u bërë pjesëmarrës në të njëjtën bijësi hyjnore të Fjalës: në Fjalën
e mishëruar, bëhet biri i Atit. Dhe Ati lind, në Fjalën e mishëruar, edhe çdo njeri
dhe, në Të, shikon dhe dashuron çdo njeri. Është zbulimi i epërm i dinjitetit t njeriut,
të çmueshmërisë së veçantë të çdo njeriu.
Jezu Krishti, Fytyra e dukshme
e Hyjit Atë
“Unë kam dalë nga goja e të Tejetlartit dhe e kam mbuluar tokën
si re... Para shekujve, qysh në fillim, Ai më krijoi... Kam vënë rrënjë mes një populli
të lavdishëm...”. Leximi i parë i kësaj të diele na jep njërin prej lavdërimeve të
mëdha të Urtisë hyjnore: ajo njëpërnjësohet nga njëra anë me Fjalën e Hyjit të bërë
person, e nga ana tjetër me Shpirtin hyjnor, që flatronte mbi ujërat parke. Prologu
i Gjonit ndjek një ritëm të ngjashëm me leximin e parë: Jezusi është Fjala, sepse
është zbulimi përfundimtar i Atit. E Fjala, për Gjonin, sjell ndër mend kujtimin e
Fjalës hyjnore të Besëlidhjes së Vjetër, Fjalë që e gjen përsosurinë e vet në Jezusin:
Ai është Fjala e Hyjit, e mishëruar për jetën e Botës. Leximi i dytë përmban himnin
me të cilin Pali e nis letrën drejtuar të krishterëve të Efesit. Hyji na ka paracaktuar
për të qenë bijtë e tij, falë veprës së Krishtit. Atij duhet t’i kërkojmë “shpirtin
e urtisë e të zbulesës, për ta njohur atë më thellë”. Pra, kemi përballë një triptik
madhështor të Shkrimit të Shenjtë: kremtojmë me solemnitet ndërhyrjen e Hyjit Atë
në historinë e njerëzve, nëpërmjet njeriut të paralajmëruar nga Besëlidhja e Vjetër;
Fjala, është Fjala e Hyjit, që u bë njeri dhe e vendosi banesën e vet mes nesh; nëpërmjet
tij Hyji “na ka bekuar me çdo bekim...”.
Fjala është mishëruar
Jezusi
është Fjala e Hyjit: nuk mund të jetë një fjalë që nuk ka kuptim. Ai është i gjithi
fjalë dhe fjala e të gjithëve. Hyji e kishte zbuluar pushtetin e tij të amshuar me
anë të krijimit, kishte dërguar profetët e vet, lajmëtarët e vet, por pavarësisht
nga kjo, kishte mbetur i mbuluar me mister, i pashqyrtueshëm, i padukshëm, i ndryrë,
përtej principatave dhe fuqive, përtej pështjellimeve dhe angështisë. Në një farë
pike, Hyji është zbuluar; ka folur qartë e kuptueshëm. Kjo ka ndodhur në Jezusin nga
Nazareti. Jezusi është Fjala, që e ka thyer heshtjen njëfarësoj të Hyjit. Përmbajtja
e kësaj Fjale është Hyji vetë. Një Hyj i ndryshëm nga si e mendonin njerëzit: ai është
Hyji Trini e dashurisë, është Ati i mëshirshëm, që e do njeriun dhe dëshiron ta shpëtojë.
Jezusi “u tregon të gjithë besimtarëve udhën e të vërtetës” thotë lutja e liturgjisë
eukaristike gjatë kushtimit të bukës e të verës. Ai ka ardhur për të na zbuluar atë
Hyj, që pret dhe thërret njeriu i çdo kohe: “... o dritë e besimtarëve... zbulohu
para të gjithë popujve në shkëlqimin e së vërtetës sate”, thotë lutja fillestare e
liturgjisë së kësaj të diele.
A nuk duhet më Hyji?
Për shumë
njerëz sot, kjo “Fjalë” bie në vesh të shurdhër. Hyji nuk është më pjesë e jetës sonë
të zakonshme. Sot ekzistenca e tij vihet në dyshim. Ateizmi nuk është më një çështje
e vetëm pak vetëve: ai prek një numër gjithnjë më të madh të njerëzve, aq sa është
bërë fenomeni i qytetërimit tonë. Fare lehtë mund të dëgjojmë njerëz që thonë: “Hyji
nuk duhet gjë”. Në të vërtetë, Hyji nuk ekziston sepse “duhet gjë”, siç mendojnë shumë
vetë. Hyji nuk është mjeku i rasteve të pashpresa , as agjenci sigurimesh, as alibi
për të shpjeguar çfarë nuk mund të kuptojë njeriu, apo çfarë uk arrin të bëjë ende. Hyji
i Jezusit nuk është një lloj tirani, dashamirës apo i zemëruar, sipas rasteve, që
ndërhyn sipas tekave në rrjedhën e ngjarjeve, për t’i ndërprerë apo për t’i ndryshuar.
Kush beson në Hyjin në këtë mënyrë, gjendet në paradhomën e ateizmit.
Kemi
nevojë për Hyjin
Nuk është e lehtë të marrësh në analizë problemin e ndërlikuar
të mungesës së fesë në botën moderne, sepse ky problem nuk është gjithmonë e gjithkund
njësoj. Shpesh herë rrënjët e problemit janë të ngulura në pamundësinë për të sqaruar
vetëdijen individuale. Nuk mungojnë as ata që përgjegjësinë për këtë gjendje ia lënë
asaj sfere të vetë krishterimit, që, e ka ushqyer e përhapur, me sjellje të gabuara
e me mendjelehtësi. Shpesh herë ateizmi dhe skepticizmi fetar i kohës sonë vjen si
rrjedhojë e mosnjohjes së mesazhit të vërtetë të krishterimit. Prandaj Kisha ua ka
shtrirë dorën ateistëve, për një takim të hapur e për dialog të sinqertë. Harrohet
se njeriu, në tërë qenien e vet shpirtërore, domethënë në aftësitë supreme për të
njohur e për të dashur, është i lidhur me Hyjin, është bërë për Hyjin. Çdo arritje
e shpirtit njerëzor e shton në të trazimin dhe ndez dëshirën për të shkuar më tej,
për të hyrë në oqeanin e qenies dhe të jetës, në të vërtetën e plotë, e vetmja që
jep lumininë. Ta heqësh Hyjin nga horizonti i kërkimit, kah i cili njeriu është i
prirur për nga natyra, do të thotë të ndrydhësh vetë njeriun. E ashtuquajtura “vdekje
e Hyjit” përfundon me “vdekjen e njeriut”. Prandaj kemi një detyrë të pashmangshme:
ta shijojmë njohjen e Hyjit; ta kërkojmë atë, ta kërkojmë me pasion, ku, si dhe kur
na e bën të mundur ta takojmë.
Pjesë nga traktati “Shpirti i Shenjtë” i
shën Bazilit, ipeshkëv (Kap. 26, 61)
Quhet njeri shpirtëror ai
që nuk jeton më sipas trupit, por udhëhiqet nga Shpirti i Hyjit, sepse merr emrin
e birit të Hyjit dhe bëhet i ngjashëm me Birin e njëlindur të Hyjit. Sikurse syri
i shëndoshë ka aftësinë për të parë, ashtu edhe shpirti që ka këtë pastërti ka forcën
vepruese të Shpirtit të Shenjtë. Sikurse mendimi i mendjes sonë, nganjëherë mbetet
i pashprehur brenda zemrës, nganjëherë shprehet me anë të fjalës, kështu edhe Shpirti
i Shenjtë nganjëherë dëshmon brenda shpirtit tonë dhe thërret në zemrën tonë: “Abba,
Atë” (Gal 4,6), nganjëherë flet në vendin tonë, sikurse thotë Shkrimi i Shenjtë Nuk
jeni ju që flisni, por në ju flet Shpirti i Atit (khs. Mt 10,20). Shpirti i Shenjtë,
duke u shpërndarë të gjithëve dhuntitë e veta, është e gjitha që gjendet në të gjitha
pjesët. Të gjithë jemi gjymtyrë të njëri-tjetrit dhe kemi dhurata të ndryshme sipas
hirit të Hyjit, që na është komunikuar. Për këtë arsye “syri nuk mund t’i thotë dorës:
nuk kam nevojë për ty; as koka këmbëve: nuk kam nevojë për ju” (1Kor 12,21). Të gjitha
gjymtyrët së bashku plotësojnë trupin e Krishtit në njësinë e Shpirtit dhe, sipas
dhuntive, bëhen të dobishme për njëra-tjetrën, si duhet. Hyji i ka renditur të gjitha
gjymtyrët e trupit, secilën sipas vullnetit të vet. Pjesët janë plot me kujdes të
ndërsjellë, sipas bashkimit shpirtëror të dashurisë. Prandaj, “nëse një gjymtyrë vuan,
të gjitha gjymtyrët e tjera vuajnë bashkë me të dhe, nëse një gjymtyrë nderohet, të
gjitha gjymtyrët gëzohen me të” (1 Kor 12,26). E meqë pjesët gjenden në të tërën,
kështu ne jemi secili në Shpirtin e Shenjtë, sepse të gjithë sa jemi në një trup të
vetëm jemi pagëzuar në një Shpirt të vetëm. Sikurse Ati bëhet i dukshëm në birin,
edhe Biri bëhet i pranishëm në Shpirtin e Shenjtë. Prandaj adhurimi në Shpirtin e
Shenjtë tregon veprimtarinë e shpirtit tonë, që zhvillohet plotësisht në dritë. Edhe
fjalët e gruas samaritane na e tregojnë këtë. Ejo, sipas kuptimit të gabuar të popullit
të vet, mendonte se duhej adhuruar Hyji në një vend të veçantë, por Zoti, duke ia
ndryshuar idenë, i tha: Adhurimi bëhet në Shpirt e në të Vërtetë (khs. Gj 4,23), duke
e përkufizuar vetveten qartas si “e Vërteta”. Pra, në të njëjtën mënyrë, në të cilën
e kuptojmë adhurimin në Birin, domethënë si adhurimin, nëpërmjet shëmbëllimit, e atij
që është Hyj e Atë, kështu duhet ta kuptojmë edhe adhurimin në Shpirtin e Shenjtë,
si adhurim ndaj atij që shpreh në vetvete esencën hyjnore të Zotit Hyj. Me të
drejtë, pra, në Shpirtin që na ndriçon, shohim shkëlqimin e lavdisë së Hyjit. Nëpërmjet
gjurmës, shkojmë tek vula dhe tek ai, të cilit i përket gjurma dhe vula dhe për të
cilin edhe gjurma edhe vula janë e njëjta gjë.