Në Ditën Botërore të Paqes, Papa ia beson Marisë, Nënës së Zotit, nevojat e mbarë
botës
Në Ditën Botërore të Paqes, Solemnitet i Marisë, Nënë e Zotit, Papa Françesku ia besoi
Zojës së Bekuar, në homelinë e Meshës, kremtuar sot paradite në Bazilikën e Shën Pjetrit,
dëshirat e zemrës sonë, e nevojat e botës mbarë.
"Zoti të bekoftë e
të ruajtë. Të ndriçoftë me fytyrën e vet e pastë mëshirë për ty. E sjelltë kah ti
fytyrën e vet e të dhëntë paqe”. Për të hapur Vitin e Ri, Papa zgjodhi
lutjen e lashtë të bekimit, të cilën Hyji ia pati këshilluar Moisiut, për të shoqëruar
shtegtimin në kohën, që hap shtigjet e veta para nesh: “Janë fjalë force,
guximi, shprese. Jo shpresë e rreme, e bazuar mbi premtime të brishta njerëzore; as
shpresë foshnjarake, që e përfytyron ardhmërinë më të mirë, vetëm e vetëm sepse është
ardhmëri. Kjo shpresë mbështetet pikërisht mbi bekimin e Zotit, bekim, i cili përmban
urimin më të madh, urimin, që Kisha i bën secilit nga ne, përplot me mbrojtjen dashamire
të Zotit, me ndihmën e Tij gjithë kujdes”. Urim, tha Papa, që u realizua
plotësisht në një grua, në Marinë, e paracaktuar të ishte Nëna e Zotit: “Ky
është titulli kryesor e themelor i Zojës. Është fjala për një cilësi, një rol, që
besimi i popullit të krishterë, në devocionin e vet plot dashuri e thjeshtësi për
Nënën qiellore, e ka përceptuar gjithmonë”. “Nëna e Zotit” na parapriu
në udhën tonë të fesë, prandaj e ndjejmë gjithnjë pranë nesh “...Nëna e
Zotit jetoi si ne, u detyrua të ecte në të njëjtat udhë, ku ecim edhe ne, nganjëherë
të vështira e të errëta. Iu desh të përballonte shtegtimin në udhët e fesë”. Maria
është burim shprese e gëzimi të vërtetë, shembull përvujtërie e gatishmërie përballë
vullnetit të Zotit. Edhe në majë të Kalvarit, e mbajti të ndezur flakën e besimit
në ngjalljen e Birit e ia përcolli plot me dashuri amtare edhe të tjerëve: “Asaj
ia besojmë udhën tonë të fesë, dëshirat e zemrës sonë, nevojat tona e nevojat e mbarë
botës, posaçërisht urinë e etjen për drejtësi e paqe; e i drejtohemi të gjithë së
bashku: Shën Mari, Nëna e Zotit”.