Прыёр экуменічнай
супольнасці Тэзэ брат Алоіз Лазэр распавёў, што мэта Еўрапейскай сустрэчы моладзі,
якая пачалася 28 снежня 2013 г. у Страсбургу, заключаецца ў тым, каб убачыць Касцёл
як вялікае сяброўства, якое павінна пашырыцца на ўсіх хрысціян, а таксама, каб спрыяць
прымірэнню паміж людзьмі. Законнік падкрэсліў, што сёлета, для ўдзельнікаў моладзевай
сустрэчы было зроблена чатыры прапановы. Першая заключаецца ў тым, каб жыць верай
не ў адзіноце, але ў супольнасці, парафіі. “Мы не жадаем ствараць рух Тэзе, але моладзь
павінна знаходзіць адзінства ў парафіях і рухах, якія існуюць”, - сказаў ён. Другая
прапанова – пашырыць межы Касцёла. Гэта значыць, выходзіць да іншых, у першую чаргу
да бедных. Наступная прапанова тычыцца дзялення і супольнай малітвы ў маленькіх групах
– прынамсі раз на тыдзень ці месяц збірацца разам, каб дзяліцца ўласнымі пытаннямі,
чытаць Евангелле, маліцца спевам ці ў цішыні. І нарэшце чацвёртая прапанова – гэта
заклік да прымірэння паміж хрысціянамі. “Калі хрысціяне жадаюць ісці за Хрыстом і
выпраменьваць Божае святло на свет, не могуць заставацца падзеленымі”, - перакананы
брат Алоіз.
Прыёр расказаў, што падчас сустрэчы ў Страсбургу адбудуцца сустрэчы
ў мясцовых сінагозе і мячэці. “Мы пагаворым пра канкрэтныя тэмы, каб канкрэтызаваць
прымірэнне і адзінства”, - сказаў ён.