Papa Françesku: Homelia në Meshën e Natës së Krishtlindjes(Tekst i plotë)
“Populli, që shtegtonte në terrina, pa një dritë të madhe”(Is 9,1).Kjo profeci
e Izaisë vijon të na prekë, posaçërisht kur e dëgjojnë në Liturgjinë e Natës së Krishtlindjes.
E nuk është thjesht fakt ngashëryes, sentimental: na prek, sepse na kujton realitetin
e thellë të vetë qenies sonë. Na tregon kush jemi: jemi popull në shtegtim, e rreth
nesh – e edhe brenda nesh – ka terr e dritë. E në këtë natë, ndërsa shpirti i errësirës
mbështjell botën, përsëritet ngjarja, që vijon të na çudisë e të na mrekullojë: populli
në shtegtim shikon një dritë të madhe. Dritë, që na nxit të reflektojmë mbi këtë mister:
mister i të ecurit e i të shikuarit. Me ecë. Folja na bën të mendojmë për rrjedhën
e historisë, për atë shtegtim të gjatë, që është historia e shëlbimit, duke nisur
nga Abrahami, ati ynë në fe, të cilin Zoti, një ditë, e thirri e i tha të nisej, të
dilte nga vendi i tij, për të shkuar kah toka, që Ai vetë do t’ia tregonte. Që asokohe
ne, si besimtarë, jemi njerëz në shtegtim kah toka e premtuar. Kjo histori shoqërohet
gjithnjë nga Zoti! Ai e mban besën e lidhur me njeriun dhe me premtimin e Tij. “Zoti
është dritë e në të nuk ka kurrfarë hijeje” (1 Gjn 1,5). Ndërsa në anën e popullit,
këmbehen çastet e dritës e të errësirës, të besnikërisë e të pabesisë, të bindjes
e të mosbindjes, çastet e popullit shtegtar e të popullit ravgues. Edhe në historinë
tonë personale këmbehen çaste të ndritura e të errëta, shndërrohen dritë e hije. Nëse
e duam Zotin e duam edhe vëllezërit, ecim në dritë, por nëse e mbyllim zemrën, nëse
në shpirtin tonë sundon mburrja, mashtrimi, interesi vetjak, atëherë mbi ne dyndet
errësira. E dyndet edhe në ne, brenda nesh, rreth nesh! “Kush e urren vëllain e vet,
shkruan Shën Gjoni Apostull, është në errësirë, ecën në errësirë e nuk e di nga ia
mban, sepse errësira ia ka verbuar të dy sytë e ballit”. Popull në shtegtim. Popull
shtegtar. Që nuk dëshiron të jetë endacak.
2. Në këtë natë, si një tufë rrezesh
ndriçuese, shkëlqen kumtimi i Apostullit: “U duk hiri i Hyjit, që u sjell shëlbimin
të gjithë njerëzve” (Tt 2, 11). Hiri, që u duk në botë, është Jezusi, i
lindur nga Virgjëra Mari, njeri i vërtetë e Hyj i vërtetë. Erdhi në historinë tonë,
nisi të ecë me ne. Erdhi për të na çliruar nga errësira e për të na dhuruar dritë.
Në Të u duk hiri, mëshira, dhimbsuria e Atit: Jezusi është dashuria, që u bë njeri.
Nuk është vetëm mjeshtër i dijes, nuk është ideal, që duam ta arrijmë e nga i cili
e dimë se jemi tepër larg, është vetë kuptimi i jetës dhe i historisë, që ngriti çadrën
ndër ne.
3. Barinjtë e panë të parët këtë ‘çadër’, e morën të parët kumtin
e lindjes së Jezusit. Qenë të parët, sepse ishin ndër të fundmit, ndër të shtypurit.
E qenë të parët, edhe sepse rrinin zgjuar natën, duke ruajtuar grigjët e tyre. Së
bashku me ta, ndalemi para Foshnjës, ndalemi në heshtje. Me ta e falënderojmë Zotin,
që na dhuroi Jezusin, e me ta e lëmë të na lartohet nga thellësia e zemrës, lavdërimi
për besnikërinë e Tij: të bekojmë, o Zot Hyj i Tejetlartë, që u ule kaq shumë për
ne. Ti je vetë madhëria e u bëre i vogël; je i pasur, e u bëre i varfër, je i gjithëpushtetshëm,
u bëre i ligësht.Në këtë natë, ta jetojmë së bashku gëzimin e Ungjillit: Zoti na do,
na do shumë, sa na dhuroi të Birin si vëlla, si dritë në errësirën tonë. Zoti na
përsërit: “Mos kini frikë!”(Lk 2,10). E edhe unë po ju përsëris: Mos kini frikë!
Ati ynë është i durueshëm, na do, na dhuron Jezusin për të na prirë në shtegtimin
drejt tokës së premtuar. Ai është drita, që davarit errësirën. Ai është mëshira: Ati
ynë fal gjithnjë. Ai është paqja jonë! Amen.