Արամ Ա. Կաթողիկոս «Թռչնոց Բոյն»-ի Մանուկներուն Հետ Դիմաւորեց Նոր Տարին
Նոր տարուան եւ Ս. Ծննդեան տօնի նախօրեակին, երկուշաբթի, 23 դեկտեմբեր 2013-ին, Արամ
Ա. վեհափառ հայրապետը միաբան հայրերու ընկերակցութեամբ այցելեց «Թռչնոց բոյն», ուր դիմաւորուեցաւ
Գայեանեան քոյրերուն, տնօրէնութեան ու խնամակալութեան անդամներուն կողմէ: Ապա, վեհափառ
հայրապետը աշակերտութեան հետ ժամանակ անցուց, լսեց անոնց Նոր տարուան ու Ս. Ծննդեան յատուկ
երգերն ու արտասանութիւնները եւ անոնց նուէրներ բաժնեց: Յայտնենք, «Թռչնոց բոյն»-ը
կը վայելէ Մեծի Տանն Կիլիկիոյ կաթողիկոսութեան հոգածութիւնը եւ վեհափառ հայրապետին յատուկ
խնամքը: «Թռչնոց բոյն»-ը սփիւռքի այն միակ հաստատութիւնն է, ուր անօգնական եւ աղքատ ընտանիքներու
զաւակներ կը պատսպարուին, ուսում եւ կրթութիւն կը ստանան` ապագային բարենպաստ կեանքի
պայմաններ ունենալու ի խնդիր: