Вечарам 24 снежня
2013 г. папа Францішак з вакна Апостальскага палацу, запаліць святло супакою. Гэтым
жэстам па-традыцыі закончыцца цырымонія ўрачыстага адкрыцця ясляў на плошчы св. Пятра.
Яе ўзначаліць кіраўнік Губернатарата Дзяржавы Ватыкан кардынал Джузэпэ Бэртэла, а
музычнае суправаджэнне забяспечыць ватыканскі аркестр, які разам з дзіцячым хорам
выканае шэраг святочных кампазіцый. Кардынал Анджэла Камастры, архіпрэзбітэр ватыканскай
базылікі, узначаліць кароткае малітоўнае чуванне. У мерапрыемстве прымуць удзел, між
іншых, прадстаўнікі дыяцэзіі Неапаль і дабрачынцы, якія дапамаглі з узвядзеннем стаенкі.
Сёлета, яна была пабудавана ў неапалітанскай традыцыі. Яе назва “Францішак 1223 -
Францішак 2013” нагадае пра сувязь паміж сучасным Пантыфікам і св. Францішкам Асізкім,
які жыў у XIII ст. і лічыцца ініцыятарам стварэння першых у гісторыі ясляў на свята
Божага Нараджэння.
Сцэну нараджэння Хрыста аздабляюць фігуры шаснаццаці пастухоў,
вышынёй да 2 метраў, апранутых у вопратку, характэрную для неапалітанскай традыцыі
XVIII ст. Апроч традыцыйных вобразаў, у кампазіцыі выкарыстаны фігуры беднага чалавека,
пажылой жанчыны і цыганкі, якая каецца перад дзіцяткам Езусам. Фонам з'яўляецца скалістая
мясцовасць.