Nata e Krishtlindjes: Mesha me Papën Françesku, në Bazilikën e Shën Pjetrit, në orën
21.30
Papa Françesku do të kryesojë Meshën e parë të Natës së Krishtlindjes sonte, duke
nisur nga ora 21.30. Kremtimi do të hapet me këngën e Kalendës, kumtim i Krishtlindjes,
që përmbledh me shkëlqim të veçantë, përmbushjen e pritjes universale të Ardhjes së
Zotit. Në përfundim të Kalendës, do të nisë procesioni i hyrjes, i shoqëruar nga Gloria,
kënga e lavdisë, kumbimi i këmbanave të Bazilikës e tingujt e organos. Në këtë
çast Ati i Shenjtë do të zbresë nga kangjellat e elterit të Dëshmimit, për të vendosur
shtatoren e Foshnjës Hyjnore në grazhd, në fronin e zakonshëm. Në përfundim të kremtimit
eukaristik, Papa do ta marrë në dorë shtatoren e Ferishtes Hyjnore e do ta çojë, me
procesion, tek Shpella e Betlehemit e Bazilikës. Atje fëmijët do t’i dhurojnë Krishtit
Fëmijë lule të freskëta. Do të jenë dhjetë fëmijë, përfaqësues të kontinenteve të
ndryshme. Gjatë uratëve, besimtarët do të luten posaçërisht për të persekutuarit
për shkak të fesë, që të marrin forcë nga Mishërimi i Fjalës së Hyjit, me bindjen
se Zoti të shpëton gjithnjë nga armiqtë. Nesër, në orën 12.00, Papa do t’u drejtojë,
nga lozha qendrore e Bazilikës, Mesazhin tradicional të Krishtlindjes besimtarëve
të pranishëm në Sheshin e Shën Pjetrit si dhe të gjithë atyre, që do ta ndjekin përmes
radios e televizionit, duke dhënë Bekimin Urbi et Orbi – Romës e Botës.