Կիրակի, 22 դեկտեմբերին, Իսրայէլի մայրաքաղաք Թել Աւիւի մէկ արուարձանին մէջ փոխադրակառք
մը ականահարուեցաւ: Իսրայէլեան ոստիկանութեան բանբեր Միքի Ռոզընֆելտ յայտնեց, որ պայթումին
պատճառով մարդկային վնասներ չեն արձանագրուած եւ, ըստ դէպքին վայրին վրայ յայտնաբերումներուն
եւ ականազերծման մասնագէտներուն, տեղի ունեցածը «ահաբեկչական յարձակում» մըն էր: Ան
ըսաւ, որ ականը յայտնաբերուած է փոխադրակառքին մէջ գտնուող պայուսակի մը մէջ եւ վարորդը
փոխադրակառքին մէջ գտնուողներուն հրամայած է անմիջապէս վար իջնել, որմէ կարճ ժամանակ
ետք ոստիկանութիւնը ժամանած է: Յիշեցնենք, որ նոյեմբեր 2012-ին Թել Աւիւի մէջ ականի
մը պայթումը աւելի քան 20 վիրաւոր պատճառած էր: Համաս շարժումը երէկ ողջունեց Թել
Աւիւի մէջ փոխադրակառքի ականահարման արարքը: