Më 23 dhjetor përkujtohet Shën Gjoni nga Kenty, Meshtar U lind në Kenty,
në vitin 1390. Meshtar e teolog, qe model për breza të tërë meshtarësh. Shërbeu si
famullitar në Olkush dhe shpirti i tij i lutjes e i pendesës, dashurie e pashtershme
për të gjithë, veçanërisht për më të varfrit, i dhanë vendin e nderit në atë shekull
të madh për Poloninë. Më 24 dhjetor është vigjilja e Krishtlindjes. Kisha
thërret ardhjen e Krishtit, urtia që zbret prej qiellit: O urti, që del nga goja
e të Tejetlartit, që shtrihesh fuqishëm nga cepi në cep dhe gjithçka rendit me ëmbëlsi,
eja e na e mëso udhën e dijes! Më 25 dhjetor është solemniteti i lindjes
së Krishtit: “Erdhi në botë drita e vërtetë, që shndrit çdo njeri... Atyre që e pranuan,
u dha zotësinë në Bëhen bij të Hyjit, atyre që besojnë në emrin e tij” (Gj 1,9.14). Më
26 dhjetor përkujtohet Shën Stefani, martiri i parë i Kishës. Ja çfarë shkruante
për festën e tij Shën Fulgjenci i Ruspes: “Dje kremtuam lindjen në kohë të Mbretit
tonë të amshuar, sot kremtojmë mundimin ngadhënjimtar të ushtarit. Dje, mbreti ynë,
i veshur me trup njerëzor e duke dalë nga prehri i Virgjërës, denjoi të vizitojë botën;
sot, ushtari, duke dalë nga tenda e trupit, hyri ngadhënjimtar në qiell”. Më
27 dhjetor përkujtohet Shën Gjoni ungjilltar. Biri i Zebedeut, vëllai i Jakobit,
nxënësi i Gjon Pagëzuesit, është ndër të parët ndjekës të Jezusit. Është dishepulli
i dashur, që, në darkën e fundit, vuri kryet në kraharorin e Jezusit. Dëshmitar i
shndërrimit dhe i agonisë së Zotit, është i pranishëm tek këmbët e kryqit, ku Jezusi
i besoi Nënën e vet. Bashkë me Pjetrin pa varrin e zbrazët të Krishtit dhe besoi në
ringjalljen e Zotit. Më 28 dhjetor përkujtohen martirët e pafajshëm. Fëmijët
e vrarë nga Herodi i japin dëshmi Krishtit jo me fjalë, por me gjak. Ata na kujtojnë
se martirizimi është dhuratë e Zotit. Më 29 dhjetor përkujtohet Shën Tomas
Beketi. U lind në Londër nga një tregtar i pasur dhe u bë kancelar i mbretit të Anglisë
Henriku II, pastaj këshilltar dhe i besuari i tij. Kancelari i shkëlqyeshëm i mbretit
u zgjodh udhëheqës shpirtëror i të krishterëve të Anglisë, u shugurua meshtar e ipeshkëv,
por mbreti, që e kishte pasur mik, u bë armiku i tij. Tomas Beket u martirizua në
katedralen e londërs, i vrarë me shpatë para altarit. Ndërroi jetë duke thënë: “E
pranoj vdekjen për Krishtin dhe për Kishën”. Më 30 dhjetor përkujtohet Familja
e Shenjtë. Familja e Marisë, Jezusit dhe Jezofit është modeli i familjes së krishterë.