Սփիւռքի դպրոցներուն տրամադրուած է 62 000 օրինակ դասագիրք, ուսումնական եւ օժանդակ նիւթեր։
2013 թուականի ընթացքին 30 երկիրներու մէջ գործող Սփիւռքի դպրոցներուն ՀՀ կրթութեան եւ
գիտութեան նախարարութիւնը տրամադրած է 62 000 օրինակ դասագիրք, այլ ուսումնական եւ օժանդակ
նիւթեր: Այս մասին կը հաղորդէ panorama.am-ը՝ վկայակոչելով ԿԳ նախարարութեան 2013-ի հաշուետուութիւնը: Բացի
գիրքերէն, spyurq.dasagirq.am կայքին մէջ տեղադրուած են նոր մեթոդական նիւթեր, սենարներ,
բաց դասեր, ինչպէս նաեւ ԿԳՆ-ի կողմէ երաշխաւորուած են Սփիւռքի մէջ ստեղծուած 2 ուսումնական
ձեռնարկներ: Տարուան ընթացքին վերապատրաստուած են 26 ուսուցիչներ 14 երկիրներէ: Արձանագրուած
է դիմորդներու 660 դիմում 18 երկիրներէ: Սուրիահայ դիմորդներուն հոսքը կը շարունակուի: Համահայկական
Հայագիտական 6-րդ ոլոմպիականին մասնակցած է 146 հոգի 8 երկիրներէ: Համահայկական մանկապատանեկան
ձեռնարկներու շարքին կազմակերպուած եւ իրականացուած է «Հայկական լեռնաշխարհէն ծնած ոգին»
խորագիրով նկարչական մրցոյթ-փառատօն, որուն ծիրէն ներս ներկայացուած են շուրջ 2000 նկարներ
18 երկիրներէ: Նշենք, որ ՀՀ կրթութեան եւ գիտութեան նախարարութիւնը պետական պիւտճէի
միջոցներու հաշուին Ջաւախքի դպրոցներուն յատկացուցած է դպրոցական գոյք` շուրջ 600 սեղան
եւ 900 աթոռ, եւ 14.700 օրինակ ուսումնական գրականութիւն: