Անհրաժեշտ է Լիբանան հաստատուած Սուրիահայ ընտանիքներու կարիքներուն յատուկ ուշադրութիւն
ընծայել. Արամ Ա. Կաթողիկոս
Հինգշաբթի, 19 Դեկտեմբեր 2013-ի առաւօտեան, Արամ Ա. կաթողիկոս իր գրասենեակին մէջ ընդունեց
«Գարակէօզեան» հիմնարկութեան տնօրէն Սերոբ Օհանեանը: Տնօրէնը լայն տեղեկութիւններ տուաւ
վեհափառ հայրապետին հիմնարկութեան ներկայ գործունէութեան մասին, յատկապէս շեշտելով սուրիահայ
ընտանիքներու գծով կատարուած ծառայութիւնը: Այս մասին կը հաղորդէ Կիլիկիոյ կաթողիկոսութիւնը: Տնօրէնին
տուած տեղեկութիւններուն համաձայն, Լիբանան հաստատուած 1350 սուրիահայ ընտանիքներ արձանագրուած
են իրենց մօտ, եւ «Գարակէօզեան» հիմնարկութիւնը կը փորձէ զանազան ձեւերով օգտակար հանդիսանալ
անոնց: Վեհափառ հայրապետը լսելէ ետք տրուած զեկուցումը, իր գնահատանքը յայտնեց «Գարակէօզեան»
հիմնարկութեան եւ նաեւ այն բոլոր բարեսիրական կառոյցներուն, որոնք իրենց կարելին կը կատարեն
օժանդակելու սուրիահայ մեր զաւակներուն: «Սուրիոյ մեր եղբայրներուն ու քոյրերուն օժանդակութիւնը
պէտք է մեր ազգին համար դառնայ առաջնահերթութիւն` ո՛չ միայն Լիբանանի, այլ նաեւ մեր բոլոր
գաղութներուն մէջ: Վերջին երկու տարիներուն ընթացքին հսկայ դժուարութիւններու դիմաց կը
գտնուի սուրիահայութիւնը. հետեւաբար, վերանորոգ թափով պէտք է շարունակել մեր օժանդակութիւնը
սուրիահայութեան վերականգնումի աշխատանքներուն»,- շեշտեց վեհափառ հայրապետը: