Krishtlindja, në kryevepra proze: Paulo Koelho “Sandalet e Hozesë” (Emisioni XVIII)
Rubrika “Krishtlindja, në kryevepra proze” na çon sot nga letërsia gjermane,
në atë braziliane, duke na njohur me një tregimtar e poet të shquar në mbarë letërsinë
botërore. Quhet Paulo Coelho (Pavlu Koelu) (Rio-de-Janeiro, 24.08.1947). Njeri me
jetë të shqetësuar, nxënës i shkollës së jezuitëve San Fernando një herë, i mbyllur
në çmendinë nga e ëma për rebelim pastaj, i përfshirë në jetën dhe kulturën e hipive,
më në fund bëri kthesën e madhe: hyri në rrugën e krishterimit, nën ndikimin e një
miku holandez, njohur në shtegtimet nëpër botë. E gjatë lisat e veprave të Koelu,
ndërmjte të cilave po kujtojmë vetëm më të sukseshmet: “Alkimisti”(Alquimista, 1988)
dhe “Rrëfimet e shtegtarit”(2000). Nga tregimet e tij të shkurtëra, zgjodhëm “Sandalet
e Hozesë”:
“Shumë vjet më parë, aq shumë sa më s’dihet data e saktë, në
një vend të Brazilit të jugut, jetonte një fëmijë shtatë vjeç, me emrin Hosè. Kishte
mbetur jetim në moshë të njomë e për të mos ravguar në rrugë të madhe, e bëri bir
në shpirt një teto tejet kurrnace. Ndonëse e krimbur në para, shpenzonte pak e aspak
për jetimin e gjorë. Hosé, që s’dinte ç’është dashuria, besonte se kështu duhet të
ishte jeta, e nuk dëshpërohej kurrë. Me që jetonin në një lagje të pasur, tetua
e detyroi drejtorin e shkollës ta pranonte të nipin me një të dhjetën e pagës mujore,
duke e kërcënuar se do ta padiste tek kryetari i bashkisë, në se do të kundërshtonte.
Drejtori u tremb e pranoi, por sa herë i jepej rasti, i nxiste mësuesit ta nëpërkëmbnin
fëmijën e varfër, duke e nxitur të bënte ndonjë të pabërë. Për ta përjashtuar përgjithnjë
nga shkolla. Po Hosè, që nuk e kishte shijuar kurrë dashurinë, mendonte se kështu
ishte jeta e nuk e prishte aspak shpirtin. Erdhi Nata e Krishtlindjes. Të gjithë
nxënësit duhet të shkonin për të parë meshë në një kishë larg banesave, me që famullitari
ishte i sëmurë. Duke ecur së bashku, fëmijët ëndërronin dhuratat, që do t’i gjenin
të nesërmën, në çorape: veshje moderne, lodra të shtrenjta, ëmbëlsira, skejtboord,
biçikleta. Sepse në botën e ëndërimeve, çorapja mund të zërë edhe biçikletën. Ishin
të gjithë të veshur si s’ka ku të vejë më mirë, siç vishen fëmijët në ditë feste.
Vetëm jetimi kishte në trup petkat e përditshme, të arnuara e në këmbë, sandalet,
tepër të vogla për këmbët tij, në rritje. Tetua ia kishte blerë kur ishte vetëm katër
vjeç e i kishte premtuar se do të mbathte një palë të reja, kur të mbushte dhjetë
vjeç. Disa fëmijë, duke e parë ashtu, të mjerë, e kishin për turp të ecin pranë zhelanit
të vogël. Por me që Hosè nuk e dinte ç’është dashuria, nuk shqetësohej fort për këtë
sjellje. Kur hynë në Kishë, dëgjoi tingujt e organos, pa dritat e njerëzit, veshur
me rrobat më të mira, pa familjet e bashkuara e prindërit, që përqafonin fëmijët.
E e ndjeu veten krijesa më e mjerë mbi faqe të dheut. Pas Kungimit, në vend që të
kthehej në shtëpi, bashkë me grupin, u ul në pragun e kapelës e qau: ndonëse nuk e
dinte ç’është dashuria, tani e kuptoi ç’do të thotë të jesh vetëm qyq, i braktisur
nga të gjithë. Në këtë ças u kujtua se pranë tij ishte ulur një fëmijë i zbathur,
edhe më i mjerë. Paska ecur shumë për të arritur deri këtu. Duket nga këmbët. Po ia
fal njërën nga sandalet, kështu do t’ia lehtësoj gjysmëm e vuajtjes, mendoi me vete
Hosè, Ai nuk e dinte ç’është dashuria, po e dinte mirë ç’është vuajtja, e nuk dëshironte
që edhe tjerët të vuanin, si ai vetë. Ia fali fëmijës sandalen e u nis kah shtëpia
me një këmbë mbathur e një zbathur. Duke e ndërruar sandalen që i kishte mbetur herë
në njërën këmbë, herë në tjetrën. Të dyja, copë nga gurët e rrugës. S’kish arritur
mirë në shtëpi, kur tetua ia nisi britmës. Nëse nipi nuk do ta gjente sandalen e humbur
deri të nesërmën në mëngjes, do të ndeshkohej rrebtë. Hosè shkoi në shtrojë i tmerruar,
sepse e dinte ç’ishte në gjendje të bënte plaka. E kaloi gjithë natën duke u dridhur
e, kur nisi të dremiste sapak, dëgjoi zëra në sallon. Tetua hyri me vrull në dhomën
e tij të mjerë, e mrekulluar. Edhe më i mrekulluar, Hosè u nis pas saj, hyri në
sallon e pa se sandalja, që i kishte dhuruar shokut të mjerimit, ishte aty. Mezi dukej
nën një grumbull vigan lodrash. veshjesh, ëmbëlsirash. Nuk mungonte as biçikleta e
as skejtbord. Fqinjët këlthisnin, e padisnin fëmijën se ua kishte vjedhur dhuratat
fëmijëve të tyre të cilët, kur ishin zgjuar, i kishin gjetur çorapët fare bosh. E
pikërisht në atë të imtë, prifti, që kishte kremtuar Meshën e Mesnatës së Krishtlindjes,
u duk në derë, duke gulçuar. Në prag të kapelës kishte gjetur një shtatore të Krishtit
Fëmijë, veshur në ar, me një këmbë zbathur e tjetrën mbathur me një sandale të vjetër.
Në sallon ra një heshtje mistike: bashkësia falënderoi Zotin e mrekullitë e tij.
Tetua nisi të qante me dënesë, e penduar e kërkoi falje. E zemra e fëmijës u mbush
përplot me zjarrin e dashurisë”.