Kirili, Patriku i Moskës: Papa Françesku na jep shumë shpresë
Patriku Kiril pohoi dje, në takimin me Kryetarin e Këshillit Papnor për Bashkimin
e të Krishterëve, kardinali Kurt Koch, se Papa Françesku ka ngjallur pritje të mëdha
dhe se ndërmjet Kishës ortodokse ruse dhe Kishës katolike janë zhvilluar disa pikëpamje
të përbashkëta. Me këtë takim kardinali Koch përmbylli vizitën e tij në Rusi, ku kishte
mbërritur më 14 dhjetor dhe ku ka pasur takime jo vetëm me bashkësitë vendore, por
edhe me përfaqësues të ministrisë së jashtme ruse. “Shumë nga gjërat që Papa Françesku
i propozon Kishës, botës, shoqërisë, është në përputhje me pikëpamjet tona”, i tha
Kirili kardinalit Koch, të cilin e priti në rezidencën e tij, në manastirin e Danilovskit.
Sipas udhëheqësit ortodoks, në momentin historik në të cilin gjendemi është shumë
i rëndësishëm dialogu ndërmjet dy kishave motra, të cilat mbajnë qëndrime të përbashkëta
për shumë çështje: që nga paqja në Lindjen e Mesme deri tek mbrojta e të krishterëve
të përndjekur, tek mbrojtja e vlerave tradicionale se familja dhe jeta. “Janë shtuar
rastet e takimeve me prelatët katolikë, duke përfshirë edhe anëtarët e kolegjit të
kardinalëve”, - shtoi Patriku, iu cili vlerëson mundësinë për të komunikuar drejtpërdrejt.
Kjo është një periudhë kontaktesh të shpeshta ndërmjet Patrikanës dhe Selisë së Shenjtë.
Në nëntor shkuan në Moskë tre përfaqësues të tjerë të lartë të Vatikanit: kardinali
Poupard, kardinali Angelo Scola e imz. Vincenzo Paglia. Edhe kardinali Koch i përshkroi
marrëdhëniet ndërmjet dy Kishave si “të mrekullueshme”. Duke folur për veprimet e
përbashkëta ndërmjet ortodoksëve dhe katolikëve për mbrojtjen e konceptit të përbashkët
të martesës, kardinali vërejti se “instituti i familjes është tani në një krizë të
thellë” dhe bëri thirrje për t’u bashkuar në luftën kundër abortit. Gjatë vizitës
së tij në Moskë kardinali Koch takoi edhe zëvendësministrin e jashtëm Alexei Meshkov,
me të cilin diskutoi për “bashkëpunimin” ndërmjet Federatës Ruse dhe Selisë së Shenjtë.
Këtë bashkëpunim e nisi në shtator Ati i Shenjtë, me letrën që i dërgoi presidentit
Vladimir Putin për të për shmangien e ndërhyrjes ushtarake të Natos në Siri.