Engjëll KOLIQI, "Miku i madh i shqiptarëve": reflektim i don Lush Gjergjit
Engjëll KOLIQI, Miku i madh i shqiptarëve, Rugova Art – DRITA, Prishtinë, 2013, fq.
261
Ky studim dhe botim i mirëfillët ndriçon jetën dhe veprën e madhe të të
Lumit Papës Gjon Pali II në dimensione familjare, thirrjes dhe shërbimit të tij meshtarak,
ipeshkvit ndihmës në Krakovë, pjesëmarrësit në Koncilin e Dytë të Vatikanit, emërimit
kardinal, zgjidhjes së tij të papritshme në Selinë e Shën Pjetrit. Sidomos theksohet
dhe paraqitet me porosi dhe fotografi dërgimi i tij apostolik gjatë pontifikatit vërtet
unik në historinë e Kishës katolike, mirëkuptimi dhe përkrahja e gjithanshme ndaj
popullit shqiptar, si dhe ndaj shumë popujve të ndrydhur dhe të shtypur. Jeta dhe
vepra e tij është aq e madhe dhe domethënëse, sa që vështirë mund të gjejmë ndonjë
emërtim të thjeshtë dhe të përbashkët për ta vlerësuar dhe cilësuar atë. Pendat më
të ngritura, regjisorët dhe kamermanët e afirmuar dhe të spikatur, gazetarët, publicistët,
krijuesitë e profileve të ndryshëm në Papën Gjon Pali II kanë pasur një Protagonist
të shkëlqyeshëm për frymëzim, një figurë të madhe për zbërthim, një shembull të prekshëm
për modelimin e njeriut dhe njerëzimit të ri. Edhe Engjëll Koliqi i bashkangjitet
kësaj “aradhe”, dhe disi dëshiron ta lajë borxhin e madh të Shqiptarëve, siç e quan
ai ndaj “Miku i madh i Shqiptarëve”, për kujdesin e tij atëror, guximin e tij të profetik
dhe biblik për ta luftuar komunizmin dhe ateizmin, për afërsinë dhe ngrohtësinë e
tij gjatë Kalvarit tonë në Shqipëri dhe në Kosovë, për shpresëdhënie ndaj së ardhmes
më të mirë për ne dhe për mbarë njerëzimin. Të gjitha këto verpimtari të llojllojshme
kanë një emërtim të përbashkët, një vlerësim të përputhur, një shqyrtim të gërshetuar
dhe të njësuar: Papa Gjon Pali II vërtet ishte Njeriu i Zotit, i Kishës Katolike dhe
i mbarë njerëzimit, Njeri i risive dhe rekordeve në Kishë dhe në botë. Afro 27 vitet
e shërbimit të tij në Selinë Apostolike të Shën Pjetrit zbuluan mendjen e tij të mprehtë,
vizionare dhe profetike, zemrën e tij të madhe, të ngrohtë dhe kozmike, vullnetin
e tij të fortë dhe të pathyeshëm për dashuri, shërbim, flijim dhe përqafim të tërë
njerëzimin, verpimtarinë e tij të palodhshme për paqe, drejtësi dhe pajtim mes njerëzve,
popujve, feve, shteteve, për njeri dhe njerëzim të afruar, të bashkuar dhe të vëllazëruar,
për bijësi me Zotin dhe vëllazëri me të afërmin. Jeta dhe veprimtaria e tij ishte
shumë e gjithanshme dhe krijuese: poet, dramaturg, filozof, teolog. Opusi i tij është
tejet i madh dhe shumë i begatshëm, me plotë shqyrtime dhe studime të gjithanshme.
Për ne Shqiptarët Gjon Pali II ishte dhe do të mbesë mik, dashamir, përkrahës
mbrojtës dhe prijës i pathyeshëm para qarqeve botërore. T’ i përkujtojmë vetëm
di sa lidhje të ngushta të tija me ne: “Unë pas popullit tim polak më së tepërmi
e dua popullin shqiptar, sepse, së pari keni vuajtur tepër gjatë e tepër shumë dhe
padrejtësisht, dhe së dyti, sepse na keni dhuruar Nënën Tereze” (2 shkurt 1981). Në
shumë fjalime, udhëtime, meshë gati gjithmonë e pati në gojë dhe në zemër popollin
shqiptar, Shqipërinë dhe Kosovën, duke theksuar fenë, shpresën dhe dashurinë, historinë,
traditën, kulturën, lashtësinë tonë, qendresën shumshekullore dhe martirizimin me
theksime mjaft të qëlluar dhe shumë pozitive. “S’ mund të mbytet njeriu që e ka
fenë e gjallë… Nëse në jetën e njeriut mbytet Zoti, mbytet edhe njeriu… Përjetoj përzemërsisht
dhe vëllazërisht këto vuajtje të mëdha me vëllazërit dhe motrat shqiuptare” (27 prill
1986). Apo: “E njoh historinë tuaj, shpeshherë të shkruar me gjak. E di se me
arsye mbaheni krenarë për ligjet dhe traditat tuaja bujare…” (6 maj 1988). Një
kapitull shumë i veçantë për Papën Gjon Pali II ishte Kosova jonë, sfidat, rreziqet,
dhuna që pësuam. Si babë dhe bari i mirë pothuaj në çdo qast dhe rast foli, shkrojti,
protestoi, apeloi, lutej për mbrojtjen e popullit të pambrojtur dhe të pafajshëm,
për lirinë dhe dinjitetin tonë njerëzor dhe kombëtar duke i cilësuar ngjarjet tona
kështu: “Krishti është përbuzur dhe refuzuar në ata të share dhe të vrarë në luftën
e Kosovës…” (29 mars 1999); “Unë mendoj për ata që janë të vrarë, për ata që janë
të pastrehë, për ata që janë të ndarë nga familjet e tyre, për ata që janë detyruar
të largohen…” (4 prill 1999). Me një fjalë pa të Lumen Nënën tonë Tereze (1910-1997)
dhe Papën Gjon Pali II s’ mund të kuptohet dhe të shpjegohe gjendja e Kosovës, ndërhyrja
e NATO-s, internacionalizimi i çështjes sonë si sfidë dhe si sprovë e ndërgjegjes
njerëzore. Papa Gjon Pali II e cilësoi Nënën Terze si përfaqësuesen më të mirë
të popullit shqiptar dhe të Kishës Katolike në dimensione botërore. “Ju falënderoj,
të dashur shqiptarë, për këtë bijë të tokës suaj, të popullit tuaj…Grua sa të vogël
me shtat, aq të madhe me vepra…që sjell dhe ruan brenda vetes hirin e bujarisë së
papërmbajtur të zemrës shqiptare…(25 prill 1993). Në lumturimin e saj ndër të tjera
tha: “Jam personalisht i falënderueshëm ndaj kësaj Gruaje të guximshme të cilën gjithmonë
e kam pasur afër vetes…” (19 tetor 2003). Këtë miqësi, dashuri dhe përkrahje ndaj
popullit shqiptar Gjon Pali II e ka shprehur në çdo vend dhe kend të botës, sidomos
gjatë vizitës së tij në Shqipëri më 25 prill 1993, në emërimin e kardinal Mikel Koliqit
(26 nëntor 1994), gjatë trazirave në Shqipëri (1997), gjatë Kalvarit të gjatë të Kosovës
(1981-1999), në përshpejtimin e procesit të lumturimit të Nënës Tereze. Në këto
lidhje të ngushta, të përzemërta dhe miqësore mes Papës Gjon Pali II dhe popullit
shqiptar, rol të rëndësishëm paten edhe dy prelatët e lartë tonë, Imzot Nikë PRELA
(1918-1996) dhe Imzot Mark SOPI (1938-2006), që fatbardhësisht vazhdon edhe me pasardhësin
e tij, Papën Benediktin XVI, tani me Papën Françeskun. Papa Gjon Pali II dhe Imzot
Nikë Prela paten takime të shpeshta dhe të përzemërta, bisedime të frytshme për Kosovën
dhe për Kishën tonë. Imzot Nikë Prela vazhdimisht e ka informuar Papën gojarisht dhe
me shkrim mbi gjendjen tonë, si dhe të gjitha institucionet tjera kishtare dhe shetetërore
të Evropës dhe të botës. Po e përkujtoj vetëm takimin e tyre të fundit më 17
tetor 1995, kur Papa dukshëm i emocionuar para Ipeshjvit në karrocë, para të gjithëve
me ofshamë goje dhe zemre klithi: “Kosova plaga dhe shpresa jonë!”. Gjon Pali II
fill pas luftës në Kosovë (1999), e falënderoi personalisht Imzot Mark Sopin, Kishën
dhe klerin katolik për guximin, dëshminë dhe shërbimin ndaj popullit të rrezikuar
pa dalime gjatë Luftës 1998-1999. Imzot Mark Sopi kështu e vlerësoi Gjon Palin
e II: “Për popullin Shqiptar Papa ishte mik i madh dhe tregoi dashuri të madhe për
të. Ai këtë e dëshmoi me vepra duke treguar angazhimin e palodhshëm në gjetjen e zgjidhjeve
paqësore për Kosovën tonë të dashur”. Kjo simpati dhe dashuri ndaj popullit shqiptar
në përgjithësi, ndaj Kosovës në veçanti, është dëshmuar dhe përforcuar edhe me takimet
e Gjon Palit II dhe Presidentit të Kosvës dr. Ibrahim RUGOVA )1944-2006). Papa
çmonte shumë Njeriun e urtë dhe veprimtarin e guximshëm, krijuesin dhe frymëzuesin
e strategjisë paqësore jodhunore në Kosovë, në Ballkan dhe në Evropë, dr. Ibrahim
Rugovën. Ja vetëm disa hollësi: Pas takimit të dr. Ibrahim Rugovës me Sekretarinë
e Shtetit të Vatikanit ai ndër të tjera tha: “Pasi Zoti, Papa, Vatikani është me ne,
atëherë jam i bindur se e dhe bota do të jetë me ne, në anën tonë…”(27 qershor 1991). Gjatë
bombardimeve të NATO-s Papa Gjon Pali II e pranoi në audiencë private dr. Ibrahim
Rugovën dhe familjen e tij. Po ashtu edhe në takimet tjera, veçmas atë të fundit në
vitin 2003, qe vlerësuar nga qarqet e Vatikanit dhe të botës si përforcim miqësie
dhe bashkëpunimi mes Selisë Shenjte dhe Kosovës. Dr. Ibrahim Rugova në një takim
me Imzot Nikë Prelën ndër të tjera tha: “Në mua kanë ndikuar pozitivisht dy personalitete
botërore, Papa Gjon Pali II dhe Nëna Tereze. Papa Gjon Pali II angazhohet gjithnjë
për paqe në mbarë botën dhe është vendosmërisht kundër dhunës dhe luftës kudo. Nëna
Tereze me dashuri e përfitoi mbarë njerëzimin…” (gusht 1993). Pjesëmarrja e delegacionit
të lartë të Vatikanit në varrimin e dr. Ibrahim Rugovës, si dhe cilësimi i tij si
“Gandi dhe vizionari paqësor i politikës”, edhe një herë dëshmuan dhe vërtetuan marrëdhëniet
e mira dhe bashkëpunimin e frytshëm mes Papës Gjon Pali II dhe dr. Ibrahim Rugovës,
Kosovës dhe Vatikanit. Në historiografinë e afërt të popullit shqiptar Papa Gjon
Pali II ka një vend kulmor dhe meritor për zhvillimin dhe zgjidhjen e çështjes së
Kosovës, si dhe më gjerë, të popullit tonë. Provani a Zotit në kohën e duhur i gjeti
njerëzit e zgjedhur dhe së bashku me ta e shkrojti një faqe të ndritshme të historisë
sonë. Njerëzit e mirë dhe të mëdhenj, si ishin papa Gjon Pali II, Nëna Tereze,
Imzot Nikë Prela, Imzot Mark Sopi, dr. Ibrahim Rugova, lindin rallë dhe nuk vdesin
kurrë. Kjo është histori, fatbardhësi dhe lumturi për ne, ngushëllim dhe siguri se
Zoti mendon dhe vepron ndër ne, për ne dhe me ne. Falënderoj përzemërsisht Engjëll
Koliqin për punë dhe studim në këtë monografi, që është edhe si “meze” për shpalljen
Shenjt të të Lumit Papës Gjon Palit II së bashku me të Lumin Papën Gjoni 23, vitin
e ardhshëm, më 27 prill 2014. Ky botim është shkruar me shumë përkushtim, flijim,
frymëzim, falënderim dhe dashuri. Shpresoj dhe uroj që të pranohet dhe lexohet me
të njëjtat ndjenja.