Арцыбіскуп Кандрусевіч падзяліўся планамі на наступны год і падвёў вынікі адыходзячага
Каталіцкі Касцёл у
Беларусі распачынае наступную душпастырскую праграму ў краіне – падрыхтоўку да святкавання
юбілею 100-годдзя фацімскіх аб’яўленняў. Гэту дату ў Паўсюдным Касцёле будуць адзначаць
у 2017 г. Менавіта сто гадоў таму, каля партугальскага горада Фаціма тром дзецям некалькі
разоў аб’явілася Маці Божая і прамовіла прароцтвы. Яе словы, як адзначыў арцыбіскуп
Тадэвуш Кандрусевіч, тычыліся таксама краін Савецкага Саюза, у тым ліку і Беларусі.
Марыя прадказала навяртанне Расіі да Бога. Яна заклікала да малітвы і пакаяння. Мы
сёння з’яўляемся сведкамі здзяйснення гэтага прароцтва. Таму святкаванне юбілею фацімскіх
аб’яўленняў – вельмі важная духоўная падзея для краіны, падрыхтоўка да якой будзе
маштабнай, адзначыў Мітрапаліт Кандрусевіч.
“Гэтыя тры гады будуць прысвечаны
наступным тэмам: 2014 – Год малітвы, 2015 – Год пакаяння, 2016 – Год надзеі, каб такім
чынам падрыхтавацца годна да гэтай вялікай падзеі. Хацелася б таксама ў гэты юбілейны
год, або падчас падрыхтоўкі, зрабіць перэгрынацыю фігуры Маці Божай з Фацімы па парафіях
Беларусі. Упэўнены, што гэта была б добрая духоўная падзея, духоўныя рэкалекцыі для
вернікаў”, - адзначыў Мітрапаліт. Такая перэгрынацыя ўжо аднойчы адбывалася па каталіцкіх
парафіях Беларусі ў 1997 г.
Арцыбіскуп Кандрусевіч, падчас перадсвяточнай сустрэчы
з журналістамі, якая адбылася 17 снежня 2013 г. у Мінску, прыадчыніў некаторыя планы
на 2014 г. і падвёў вынікі года адыходзячага. 2013 г. быў для Каталіцкага Касцёла
вельмі насычаным. Перш за ўсё, гэта год новага Папы. Святы Айцец Францішак быў абраны
ў сакавіку і адразу здолеў заваяваць любоў людзей ва ўсім свеце, бо вельмі проста
і зразумела размаўляе з кожным чалавекам. Хутка з’явілася і яго першая энцыкліка,
у якой Пантыфік заклікаў распаліць нанова агонь веры і адказваць на выклікі сучаснасці.
Што тычыцца Беларусі, летам быў урачыста адсвяткаваны юбілей 400-годдзя прыбыцця
абраза Маці Божай у Будслаў. З гэтай нагоды краіну наведаў і папскі пасланнік кардынал
Жан-Луі Таран. Сапраўднай сенсацыяй стала прызначэнне папам Францішкам трох новых
біскупаў для Касцёла ў Беларусі. Апошняе біскупскае пасвячэнне адбылося ў краіне 14
гадоў таму. Нагадаў іерарх і аб цікавай спартыўнай падзеі – у лютым Беларусь упершыню
прыме VIII Чэмпіянат Еўропы па міні-футболе сярод святароў, у якім возьмуць удзел
14 краін.
Паведаміў Мітрапаліт і аб асаблівасцях святкавання надыходзячага
Божага Нараджэння. Ён нагадаў, што святочная св. Імша, якая будзе трансліравацца ў
прамым эфіры “1 каналам” 24 снежня вечарам, пройдзе сёлета ў касцёле св. Сымона і
св. Алены.
Святочная сустрэча Мітрапаліта Кандрусевіча з журналістамі завяршылася
пажаданнямі радасных святаў і традыцыйным ламаннем аплаткай.