Տեղի ունեցաւ «Յարափոփոխ աշխարհ, փոփոխուող սփիւռք» խորագրով կլոր սեղան-քննարկում

Դեկտեմբերի 13-14-ը Հայաստանի Հանրապետութեան սփիւռքի նախարարութեան նախաձեռնութեամբ կայացաւ «Յարափոփոխ աշխարհ, փոփոխուող սփիւռք» խորագրով կլոր սեղան-քննարկումը, որին մասնակցում էին գիտնականներ, հոգեւոր եւ համահայկական կառոյցների ներկայացուցիչներ Հայաստանից եւ սփիւռքից:
Բացման խօսքով հանդէս եկաւ Հայաստանի Հանրապետութեան սփիւռքի նախարար Հրանուշ Յակոբեանը, նա ներկայացրեց արագ փոփոխուող, համաշխարհայնացող աշխարհում ի յայտ եկած ժողովրդագրական պատկերը եւ ձեւաւորուած տարբեր ժողովուրդների սփիւռքների ու մասնաւորապէս հայկական սփիւռքի առջեւ ծառացած հիմնախնդիրները: Նշուեց, որ յարափոփոխ աշխարհում սփիւռքի նկատմամբ տարուող քաղաքականութիւնը սկսել է վերազգային նշանակութիւն ձեռք բերել, միջազգային շատ կառոյցներ սկսել են զբաղուել սփիւռքի հիմնախնդիրներով, եւ այդ համաթեքսթում համազգային ներուժի համախմբումը, հայապահպանութեան եւ հայադարձութեան խթանման նպատակով իրականացուող աշխատանքների համակարգումը, այս ոլորտում գործակցութեան ձեւերի եւ ուղիների կատարելագործումը դարձել է անհրաժեշտութիւն: Նա ներկայացրեց համազգային օրակարգի խնդիրների լուծման ուղղութեամբ համայնքների գործունէութեան կառուցակարգերը վերատեսութեան ենթարկելու հիմնախնդիրները:
Փոփոխուող սփիւռքին առնչուող հարցադրումների վերաբերեալ իրենց դիրքորոշումները, տեսակէտներն ու փորձառութիւնը ներկայացրեցին սփիւռքեան տարբեր տարածաշրջանների, սփիւռքագիտութեան եւ դրան առնչուող գիտական տարբեր շրջանակների ներկայացուցիչներ՛
Քննարկման մասնակիցները ներկայացրեցին սփիւռքեան խնդիրներին առնչուող արդիական տեսութիւններ, ու դրանց միտումները, իրենց կողմից իրականացուող ծրագրերը:
Կարեւոր քննարկումներ տեղի ունեցան երիտասարդութեան շրջանում անցեալի վերաբերեալ յիշողութեան պահպանման, ազգային ինքնութեան գիտակցութեան ամրապնդման, հայրենաճանաչութեան եւ համազգային ձեռնարկներում նրանց ներգրաւուածութեան, հայոց լեզուի պահպանման, համայնքների կրթական ու մշակութային հարցերի եւ յատկապէս Ցեղասպանութեան 100-րդ տարելիցին նուիրուած քայլերի ձեռնարկման ուղղութեամբ:
Կլոր սեղան-քննարկումն իր ձեւաչափով ազատ, բաց քննարկումների հանրագումար էր: Ամփոփելով արդիւնքները` Հայաստանի Հանրապետութեան սփիւռքի նախարար Հրանուշ Յակոբեանը մեծապէս կարեւորեց նման բանավէճ-քննարկումների դերը սփիւռքագիտութեան զարգացման, Հայաստանի եւ սփիւռքի փոխճանաչման, նոր կառուցակարգերի մշակման գործում: Նա ընդգծեց սփիւռքի ներուժի համախմբման, պաշարների փոխշահաւէտ օգտագործման կարեւորութիւնը, այդ թւում Հայաստանի Հանրապետութեան հանրային, մասնաւոր հատուածում, ինչպէս նաեւ պետական կառավարման համակարգում սփիւռքահայ մասնագէտների ներգրաւման անհրաժեշտութիւնը: Նախարար Հ. Յակոբեանը հաւաստիացրեց, որ քննարկմանն մասնակիցների առաջարկութիւնները կ՛ուսումնասիրուեն եւ կ՛օգտագործուեն Հայաստան-սփիւռք գործակցութեան արդիականացման եւ սփիւռքի նկատմամբ տարուող քաղաքականութեան բարեփոխման գործընթացում: