Kardinali Koh, në Rusi, do të takohet me Patrikun Kirill
Kardinali Kurt Koh, kryetar i Këshillit Papnor për Nxitjen e Bashkimit të të Krishterëve,
nisi dje një shtegtim gjashtëditor në Rusi, me ndalesa në Shën Petersburg e Moskë,
për t’u takuar me përfaqësues të ndryshëm të Kishës ortodokse e të Kishës katolike.
Hirësia e Tij do të pritet nga Patriku Kirill i Moskës dhe i gjithë Rusisë e do
të takohet me metropolitin Hilarion, kryetar i departamentit për marrëdhëniet e jashtme
kishtare të Patriarkanës i cili, më 12 nëntorin e kaluar, u takua me Papën Françesku,
në Vatikan. Në Shën Petersburg, kardinali do të mbajë një konferencë mbi progresin
e dialogut katoliko-ortodoks, pranë Akademisë së teologjisë të qytetit; do të vizitojë
manastirin e Lavre Alexandre Nevski, që kremton sivjet treqindvjetorin e themelimit.
Gjatë vizitës, me ftesë të imzot Paolo Pecit, kryeipeshkëv i Kryedioqezës katolike
të Nënës së Zotit, në Moskë, do të kryesojë kremtimin e jubileut të 250-vjetorit të
Bazilikës së Shën Katerinës së Aleksandrisë, në Shën Petersburg.