Përshëndetja e të mëdhenjve të kësaj bote për Mandelën. Obama: “Një gjigant i historisë”
Të mëdhenjtë e kësaj bote nderuan sot në Johanesburg, Afrika e Jugut, Nelson Mandelën.
Ati i luftës kundër aparteidit u kujtua nga personalitete të rëndësishme, si presidenti
amerikan Barak Obama, i cili e quajti “gjigant i historisë”. Homazhi për këtë lider
të nderuar, që ndërroi jetë në moshën 95-vjeçare, pavarësisht nga 27 vitet e burgut,
sipas traditës më të mirë afrikane, u karakterizua nga këngë e valle, nga një atmosferë
festive. Në stadiumin e Souetos, vend i kampionatit botëror të futbollit, qendra e
protestave kundër racizmit, është vendosur fytyra e buzëqeshur e Madibës, siç thirrej
Mandela me përkëdheli. Shiu nuk e frenoi aspak entuziazmin e të pranishmëve e as fishkëllimat
e afrikanojugorëve, kur në kamerat kthehen nga presidenti aktual Zuma. Pas lutjeve,
kujtimet e familjes së Madibës. Prekëse, fjalët e Sekretarit të Përgjithshëm të OKB-së,
Ban Ki-mun: “Urrente urrejtjen, nuk urrente njerëzit, tregoi ç’është pushteti
i madh i faljes”. Kjo qe dhurata dhe mësimi, që na la Mandela, vazhdoi Ban
Ki-mun. Pastaj, radha e presidentit amerikan, Barak Obama, i cili, para se të mbërrinte
në tribunë, i shtrëngoi dorën presidentit kuban Raul Kastro – gjest, që u vu në dukje
nga të gjithë, për shkak të marrëdhënieve ndërmjet dy vendeve. Duartrokitje të fuqishme
shoqëruan çastin kur Obama e quajti Mandelën “gjigant i historisë”: “Është e
vështirë t’i nderosh njerëzit, por është edhe më e vështirë kur bëhet fjalë për Mandelën,
ikonë e lirisë e shekullit XXI”. Nelson Mandela, vazhdoi Obama, më ka bërë
njeri më të mirë. Pastaj, ironi për shumë qeveritarë: “Ka shumë liderë, që shprehin
solidaritet me luftën e Madibës për liri, por nuk tolerojnë asnjë kundërshtim nga
ana e popullit të tyre. Ka shumë njerëz ndër ne, që rrinë mënjanë, rehat, cinikë,
ndërsa duhet t’i dëgjojnë zërat, që vijnë nga poshtë”. “Ishte shembull – shprehet
kardinali Uilfrid Foks Napier, kryeipeshkëv i Durbanit, në një intervistë për “La
Corix”. Mishëronte përvuajtërinë e kishte respekt të madh për ata, që e rrethonin.
Edhe kardinali i ndjerë Karlo Maria Martini, kur e patën pyetur cili ishte personi
më i veçantë, që kishte takuar gjatë jetës, u përgjigj: “Mandela. Sepse ishte i vetmi
pa asnjë hije zemërimi. Njeri, krejtësisht në paqe”. E shiu i sotëm, për banorët
e Afrikës së Jugut është bekim. “Nuk mund ta ndalojmë – thanë plot njerëz – por vetë
Mandela do ta kishte dashur: në traditën afrikane, kur bien shi në ditën e varrimit,
është shenjë e mirë, sepse do të thotë se personi do të mirëpritet në mbretërinë e
qiellit”.