Në vijim të intervistës me Atë Spadaron, sot Papa Françesku flet për kërkimin e Hyjit.
Hyji nuk gjendet aq në siguritë dogmatike, sa në befasitë e jetës. Hyji gjendet brenda
dinamikave të jetës. Ja pyetja e Atë Spadaros për Papën: “Nëse takimi me Hyjin
në të gjitha gjërat nuk është një ‘eureka’ empirike – e pyes Papën, e nëse
flasim për një proces, që lexon historinë, mund të bëhen edhe gabime...” “Po, në
këtë përpjekje për të kërkuar e për të gjetur Hyjin tek të gjitha gjërat ngelet gjithmonë
një zonë pasigurie. Duhet të gjendet. Nëse dikush thotë se e ka takuar Hyjin me siguri
dhe nuk ka as hijen e pasigurisë, atëherë nuk është në rregull. Sipas meje ky është
një çelës i rëndësishëm. Nëse dikush e ka një përgjigje për të gjitha pyetjet, ja,
kjo është prova se Hyji nuk është me të. Do të thotë se është një profet i rremë,
që e përdor besimin fetar për vete. Udhëheqësit e mëdhenj të popullit të Hyjit, si
Moisiu, i kanë lënë vend gjithmonë dyshimit. I duhet lënë hapësirë zotit, jo sigurive
tona; duhet të jemi të përvuajtur. Pasiguria është pjesë e çdo përzgjedhjeje të vërtetë,
që është e hapur ndaj miratimit të ngushëllimit shpirtëror”. Gjatë kërkimit dhe
gjetjes së Hyjit në të gjitha gjërat, rrezikohet të shtjellohet së tepërmi, rrezikohet
të thuhet me siguri njerëzore dhe arrogancë: ‘Hyji është këtu’. Kështu do të gjenim
vetëm një hyjni sipas masës sonë. Qëndrimi i drejtë është qëndrimi agostinian: me
e kërkue Hyjin, për me e gjetë; me e gjetë, për me e kërkue
gjithmonë. E shpesh herë kërkohet me kuturisje, siç lexohet në Bibël. Kjo është përvoja
e etërve të mëdhenj në fe, që janë modeli ynë. Duhet rilexuar kapitulli 11 i Letrës
drejtuar Hebrenjve. Abrahami u nis pa ditur ku shkonte, me anë të fesë. Të gjithë
paraardhësit tonë në fe kanë vdekur duke i parë të mirat e fesë, por nga larg... Jeta
nuk na është dhënë si libreti i operës, ku gjithçka është e shkruar, por ajo është
me shkue, me ecë, me ba, me kërkue, me pa... Duhet
të hyjmë në aventurën e kërkimit të takimit me Hyjin, dhe të lejimit të Hyjit për
të na kërkuar e për të na gjetur”. “Sepse Hyji vjen para, vjen përherë para, Hyji
primerea (prin). Hyji është, në një farë mënyrë, si lulja e bajames së Sicilisë
sate, Antonio, që çel e para, gjithmonë. E lexojmë tek profetët. Pra, Hyji takohet
duke ecur, në udhë. Tani, dikush mund të thotë se ky është relativizëm. A është relativizëm?
Po, nëse kuptohet gabim, si një lloj panteizmi i pa davaritur. Jo, nëse kuptohet sipas
domethënies biblike, sipas së cilës Hyji është gjithmonë befasi dhe, prandaj, nuk
e di kurrë ku dhe si e gjen, nuk je ti ai që cakton kohët dhe vendet e takimit me
të. Është e nevojshme, pra, të përzgjidhet takimi. Për këtë, përzgjedhja është themelore”.
Nëse i krishteri është restauracionist, legalist, nëse gjithçka e do të qartë
e të sigurte, atëherë nuk gjen asgjë. Tradita dhe kujtimi i së shkuarës duhet të na
ndihmojnë të kemi guxim, për t’i hapur Hyjit hapësira të reja. Kush kërkon sot gjithnjë
zgjidhje disiplinore, kush anon me tepri kah “siguria” doktrinarë, kush kërkon me
kokëfortësi të ripërtërijë të shkuarën e humbur, ka botëkuptim statik dhe prapambetës.
Në këtë mënyrë, feja bëhet një ndër ideologjitë e shumta. Unë kam një siguri dogmatike:
Hyji është në jetën e çdo njeriu, Hyji është ne jetën e secilit. Edhe nëse jeta e
dikujt ka qenë një kob, nëse është rrënuar nga veset, nga droga ose nga çdo gjë tjetër,
Hyji është në jetën e tij. Ai duhet dhe mund të kërkohet tek çdo jetë njerëzore. Edhe
nëse jeta e një njeriu është truall plot gjemba dhe egjër, gjendet gjithmonë një hapësirë,
ku mund të rritet fara e mirë. Duhet të kemi besim te Hyji”.