Ватыканскі іерарх пра крызіс святарскай ідэнтычнасці
Ці сучасны крызіс
ідэнтычнасці святарства, гэта толькі наступства пратэстанцкай Рэфармацыі шаснаццатага
стагоддзя? – такое пытанне паставіў на старонках ватыканскай газеты прэфект Кангрэгацыі
Веравучэння, арцыбіскуп Герхард Людвіг Мюлер. На яго думку, гэта было б значным спрашчэннем,
як зрэшты і сцвярджэнне, што цэлібат – гэта перажытак мінулага і адзіная прычына недахопу
святароў. Паводле меркавання іерарха, крызіс святарства ў заходнім свеце ў апошнія
дзесяцігоддзі, гэта, перш за ўсё, вынік “радыкальнай дэзарыентацыі хрысціянскай ідэнтычнасці”
перад тварам сучаснай філасофіі, якая пазбаўляе сутнасць існавання свету “трансцэндэнтнай
і эсхаталагічнай перспектывы”.
Прэфект не ўтойвае, што “корань крызісу святарства”
варта шукаць таксама ва “унутрыкасцёльным фактары”. Мода на “пратэстанцкае” бачанне
святарства 50-60-х гадоў мінулага стагоддзя прычынілася да “лютай крытыкі” сакрамэнтальнага
святарства ў Каталіцкім Касцёле. Сцвярджалася нават, што яно не мае біблійных падстаў.
Але сапраўдны характар сакрамэнтальнага святарства, нагадаў арцыбіскуп Мюлер, палягае
на “мандаце самаго Хрыста”, які праз словы асобы, уключанай у сакрамэнтальнае святарства,
“прысутнічае ў якасці адзінага найвышэйшага святара ў Касцёле Божым, які сабраўся
для цэлебрацыі літургіі”.
У сваім артыкуле на старонках “L’Osservatore Romano”
прэфект Кангрэгацыі Веравучэння часта спасылаецца на меркаванне Бэнэдыкта XVI і поўны
збор яго твораў. Менавіта Папа на пенсіі, на думку арцыбіскупа, паказвае дарогу, вядучую
да пераадолення крызісу. Трэба рабіць усё, каб знайсці адпаведныя ўстаноўкі і матывацыю,
прычым, як тэалагічнага, так і сацыялагічнага кшталту, якія дапамаглі б каталіцкім
святарам, што некалі пачыналі свой шлях з любоўю і стараннасцю, а затым апынуліся
ў асабістай нявызначанасці і блытаніне адносна сваёй ролі ў Касцёле, адшукаць ідэнтычнасць.
“Погляд і словы Езуса”, нагадаў іерарх, з’яўляюцца невычэрпнай крыніцай святарскай
ідэнтычнасці, што выводзіць “з пустыні кожнага крызісу, у зямлю абяцаную”.