Zoja e Bekuar është e veshur me diell, sepse jeton në dritën e Hyjit, e ka hënën nën
këmbë, sepse e la pas vetes vdekjen. E na thotë “Guxim! Në fund fiton dashuria! Guxoni
të jetoni kështu, pa u frikësuar nga kërcënimet e dragoit”.Gruaja e veshur me diell
e nxjerr në dritë foshnjën me dhimbje: është simbol i Kishës shtegtare në të gjitha
kohët: në të gjitha breznitë duhet ta lindë përsëri Krishtin, ta sjellë në botë Krishtin
me dhimbje të madhe në gjirin e njerëzimit, që vuan. Është Kishë e përndjekur nga
dragoi në të gjitha kohët, por në të tëra kohët jeton në dritën e Hyjit. E kështu
në të gjitha mundimet Kisha, duke vuajtur, fiton e është garanci e pranisë së dashurisë
së Hyjit kundër ideologjive të urrejtjes e të egoizmit. E dragoi edhe sot dëshiron
ta përpijë Hyjin foshnje: “Mos mendoni për këtë Hyj, i ka kaluar koha!” – na thonë
– por edhe sot ky Hyj i ligshtë, është i fortë, është forca e vërtetë. E Nëna e Tij
e Papërlyer na fton të kemi besim e shpresë.