Прэфект Кангрэгацыі Веравучэння адказаў крытыкам літургічнай рэформы
Літургія з’яўляецца
эфектыўным сродкам супраць культуры без Бога, заявіў прэфект Кангрэгацыі Веравучэння.
Арцыбіскуп Герхард Людвіг Мюлер выступіў на форуме ў нямецкім Вюрцбургу, прысвечаным
50-годдзю канстытуцыі ІІ Ватыканскага Сабору аб літургіі „Sacrosanctum concilium”.
Літургічная рэформа, паводле іерарха, стала каталізатарам місійнай дзейнасці Касцёла.
Ён не пагадзіўся з крытыкамі, якія лічаць, што Сабор і яго рашэнні аб рэформе літургічных
кніг прычыніліся да страты веры і зніжэння рэлігійнасці ў краінах Заходняй Еўропы.
Сама рэформа, нагадаў арцыбіскуп, не была разрывам з Традыцыяй, проста некаторыя выкарысталі
яе неадказна, не разумеючы яе сапраўднага духа.
Каб нанова адкрыць сэнс літургіі
і знайсці выхад з крызісу, трэба паставіць большы акцэнт на яе тэалагічнай і антрапалагічнай
складаючай, лічыць іерарх. Ён перасцярог ад радыкальных інавацый і прыватных новаўвядзенняў,
у выніку якіх літургічная рэформа становіцца проста “акцыянізмам”, народнай педагогікай,
тэрапіяй, ці нават самавыяўленнем.