Папа на Дзень хворых: клопат пра пакутуючых набліжае Божае Валадарства
Пацвярджэннем сапраўднай
веры ва ўкрыжванага Хрыста з’яўляецца дар з самаго сябе – любоў да бліжняга, асабліва
да таго, хто яе не годны, хто пакутуе і маргіналізаваны, адзначыў папа Францішак у
пасланні на Сусветны дзень хворага, апублікаваным 7 снежня 2013 г. Пантыфік падкрэсліў,
што Езус прысутнічае ў пакутах людзей хворых. Ён, стаўшы чалавекам, не пазбавіў людзей
досведу хвароб і пакутаў, але, прыняўшы іх на сябе, надаў ім новае, станоўчае значэнне.
Ён паказаў, што пакуты – гэта не апошняя кропка. “Як Айцец падарыў Сына і Сын падарыў
самаго сябе дзеля любові, таксама і мы павінны любіць бліжніх, як Бог палюбіў нас,
даючы жыццё братам”, - напісаў папа Францішак. Пантыфік нагадаў, што сілай сакрамэнтаў
хросту і канфірмацыі вернікі пакліканы станавіцца падобнымі да Хрыста – “добрага самараніна
для ўсіх пакутуючых”. “Калі мы з пяшчотай набліжаемся да патрабуючых клопату, нясём
надзею і ўсмешку Бога ў супярэчнасці свету”, - падкрэсліў Францішак і дадаў, што шчыры
клопат аб іншых становіцца “нашым укладам у набліжэнне Божага Валадарства”.
Каб
узрастаць у неабходных пяшчоце і любові, нам патрэбны прыклады, заўважыў Святы Айцец
і заклікаў углядацца ў жыццё Марыі, якая заўсёды была ўважлівай да голасу Бога і адкрытай
на патрэбы бліжніх. Таксама Францішак нагадаў пра св. Яна, які наблізіўся да крыніцы
любові, будучы разам з Марыяй ля падножжа крыжа. “Хто стаіць пад крыжом з Марыяй,
вучыцца любіць як Езус”, - адзначыў Святы Айцец.
Сусветны дзень хворых адзначаецца
ў Каталіцкім Касцёле 11 лютага, у дзень першага аб’яўлення Маці Божай у Лурд. Ён быў
устаноўлены бл. Янам Паўлам ІІ 13 мая 1992 г.