Papa: të lutemi, deri ‘në bezdi’, që Zoti të na dëgjojë, gjithnjë të sigurtë në ndihmën
e Tij
Duhet të lutemi me ngulm, të sigurt se Zoti do ta dëgjojë lutjen tonë. Mbi
këtë aspekt reflektoi Papa Françesku në homelinë e Meshës, kremtuar sot paradite në
Shtëpinë e Shën Martës. Lutja, pohoi Papa, ka dy aspekte është ‘nevojtare” e njëkohësisht
“e sigurt” se Zoti, në kohët e veta e në mënyrat e veta, do ta dëgjojë e do të na
e japë hirin, që kërkojmë.
Lutja, kur është vërtet e krishterë, lëkundet ndërmjet
nevojës e sigurisë se do të dëgjohet, edhe pse nuk dihet si e kur. E kjo, sepse kush
lutet, nuk ka frikë se po e shqetëson Zotin, nga që beson verbërisht në dashurinë
e tij prej Ati. Verbërisht, si dy njerëzit pa dritë në sy, për të cilët flet faqja
e sotme e Ungjillit. E këta dy bërtasin sa mundin, duke rendur pas Jezusit e duke
iu lutur t’i shërojë. Ose si i verbëri i Jerikos, që i lyp dritë Mësuesit, duke bërtitur
sa i ha zëri, pa pyetur fare për ata, që mundohen ta bëjnë të heshtë. E kjo, sepse
vetë Jezusi, kujtoi Papa Françesku, na mëson të lutemi si miku i paftuar, që lyp bukë
në pikë të mesnatës, ose si vejusha, që lyp drejtësi nga gjykatësi e padrejë: “Nuk
e di nëse kjo mund të tingëllojë keq, por të lutesh është njëlloj si ta bezdisësh
sadopak Zotin, që të na dëgjojë. Por Zoti na e thotë vetë: si miku në mesnatë e si
vejusha te gjykatësi... Për të tërhequr, kështu, sytë e Zotit, që ai të na shohë.
E këtë bënë edhe të gërbulurit, që iu afruan e i thanë: ‘Nëse ti do, mund të na shërosh!’.
E bënë këtë krejt të sigurt. Kështu na mëson të lutemi vetë Jezusi. Kur lutemi, nganjëherë
mendojmë: ‘Epo, unë po ia kujtoj këtë nevojë; po ia kujtoj Zotit një herë, dy ...
po nuk e kam gjithë këtë forcë. Lutem deri në një shenjë vendi e pastaj lodhem, harroj
të lyp’. Por këta njerëz, që ecin në faqen e Ungjillit, bërtasin e nuk lodhen kurrë.
Jezusi na thotë: ‘Lypni!’. E edhe: ‘Trokisni në portë’, e kush troket, bën zhurmë,
bezdis, shqetëson”. Ngulm, deri në kufi të bezdisë, prandaj! Por edhe siguri
të patundshme. Të verbërit e Ungjillit vijojnë të jenë shembull. Janë të sigurt, theksoi
Papa, se Zoti do t’ua kthejë dritën e syve, po t’ia kërkojnë. Prandaj pyetjes së Jezusit:
“A besoni se mund t’ju shëroj”, i përgjigjen: “Po, o Zot, besojmë! Madje jemi të sigurt”: “E
lutja i ka këto dy pamje: është nevojtare dhe e sigurt. Lutje nevojtare gjithnjë!
Lutja, kur ne lypim ndonjë gjë, është nevojtare: ‘E kam këtë nevojë, dëgjoma zërin,
o Zot!’. Por kur është e vërtetë, është edhe e sigurt: ‘Dëgjomë! Unë besoj me gjithë
zemër se Ti mund ta bësh, sepse Ti vetë më ke premtuar”. Ai premtoi: ky
është guri i themelit, mbi të cilin ngrihet siguria e lutjes. Me këtë siguri, përsëriti
Papa Françesku, ne ia rrëfejmë Zotit nevojët tona, të sigurt se Ai do të na e japë
hirin e kërkuar. Të lutesh, vijoi akoma Ati i Shenjtë, do të thotë ta dëgjosh përsëri
zërin e Jezusit, që përsërit po atë pyetje, të cilën ua pati bërë dy të verbërve:
“Ti, a beson se unë mund ta bëj këtë?”: “Ai mund ta bëjë! Kur e bën e si
e bën, këtë nuk mund ta dimë. Kjo është siguria e lutjes. Nevoja për t’i thënë të
vërtetën Zotit. ‘Jam i verbër, o Zot. Kam këtë nevojë. Kam këtë lëngatë. Kam bërë
këtë mëkat. Kam këtë dhimbje…’.. Por gjithnjë të vërtetën, ashtu si është. E ai e
ndjen nevojën tonë, ndjen se po lypim, krejt të sigurt se do të na jepet. Mendojmë
se lutja jonë është nevojtare dhe e sigurt: nevojtare, nga që ia themi të vërtetën
vetvetes; e sigurt, nga që besojmë se Zoti mund ta bëjë, atë që i kërkojmë”.