Францішак: “хрысціянскія словы” без Хрыста ствараюць падзелы
Хто прамаўляе “хрысціянскія
словы”, не рэалізуючы іх на практыцы, робіць блага сабе і іншым, перакананы папа Францішак.
Каментуючы евангельскую прыпавесць пра дом пабудаваны на скале, падчас ранішняй св.
Імшы 5 снежня 2013 г., Папа адзначыў, што фундаментам хрысціянскага жыцця павінна
быць слуханне і спаўненне Божага слова. Езус папракаў фарысеяў менавіта за тое, што
яны не жылі тымі запаведзямі, пра якія добра ведалі і так шмат казалі, заўважыў Францішак
і дадаў, што гэтыя “добрыя словы”, калі не спаўняюцца на практыцы, не толькі не патрэбныя,
але і шкодныя. Ён падкрэсліў, што жывучы без Хрыста, але карыстаючыся хрысціянскімі
словамі, людзі падманваюць сябе – думаюць, што маюць “прыгожы дом”, але на самой справе
ён стаіць без фундамента. А фундаментам можа быць толькі Хрыстус. Тады і словы становяцца
па-сапраўднаму моцнымі, даюць жыццё, падштурхоўваюць ісці наперад і дапамагаюць вытрымаць
любыя напады.
У адваротным выпадку, лічыць Святы Айцец, чалавек упадае ў пыху
і фальшывую ўпэўненасць ў сабе. А Пан, у сваю чаргу, скідвае з тронаў такіх асоб,
пра што ўзгадваецца, між іншым у словах “Магніфікату” Марыі.
Францішак заклікаў
вернікаў зрабіць рахунак сумлення са сваіх словаў і прасіць Бога аб ласцы пакоры і
сціпласці, каб сказанае намі ніколі не стварала падзелаў у Касцёле.