Пантыфік пачуе адвэнтавыя медытацыі прапаведніка Папскага Дома
“Да Божага Нараджэння
разам са св. Францішкам Асізскім” – гэта тэма медытацый, якія прапаведнік Папскага
Дома, капуцын Раньера Канталамеса, прапануе папе Францішку і яго супрацоўнікам у кожную
з пятніц Адвэнту. Першая прагучыць у мурах Апостальскага палацу 6 снежня 2013 г. Законнік
прызнаўся, што да абрання тэмы яго натхніла нядаўняе падарожжа Пантыфіка ў Асізі і
абраная ім тэма наступнага Сусветнага дня міру: “Братэрства – падмурак і шлях да міру”.
Ён перакананы, што св. Францішак можа шмат чаго сказаць сучаснаму Касцёлу. Айцец Канталамеса
прапануе паглядзець на постаць Бедняка праз яго пакору, беднасць і імкненне рэфармаваць
Касцёл.
У капліцу “Redemptoris Mater” пачуць медытацыі запрошаны кардыналы,
арцыбіскупы і біскупы, сакратары дыкастэрый, прэлаты Рымскай курыі і вікарыяту Рыма,
генеральныя настаяцелі манаскіх кангрэгацый.