''Ֆրանչիսկոս 1223 - Ֆրանչիսկոս 2013'' Սուրբ Ծննդեան առթիւ Սուրբ Պետրոսի հրապարակի մսուրը։

Սուրբ Ծննդեան տօնին առթիւ, ամէն տարի, Սուրբ Պետրոսի հրապարակին վրայ կը զետեղուի Սուրբ Ծնունդը խորհրդանշող հսկայական մսուր մը եւ կաղանդի տօնածառը։
2013-ի մսուրը` նուէր է Իտալիոյ Նափոլի քաղաքի հռչակաւոր Գանդոնէ եւ Գոսդապիլէ արուեստանոցին որ 2013-ի որպէս բնաբան ընտրած է ''Ֆրանչիսկոս 1223 - Ֆրանչիսկոս 2013''։
Նափոլի քաղաքի մսուրներու արուեստանոցները հանրածանօթ են համայն աշխարհի մէջ։ Սուրբ Պետրոսի հրապարակի մսուրը պիտի ունենայ` 7-ով 12 մեթր տարածք եւ 6 մեթր բարձրութիւն։ Մինչ տօնածառը, որ Վատիկան ժամանեց 5 դեկտեմբերին, նուէր է Պավիէրայի քաղաքապետութեան։ Ծառը ունի 25 մեթր բարձրութիւն եւ գրեթէ 1 մեթր լայնք։
Տօնածառի եւ մսուրի շինութեան աշխատանքները սկիբ առին այս օրերուն։ Մսուրին բացումը նախատեսուած է 24 դեկտեմբերի գիշերը ճրագալոյցի պատարագէն առաջ։
Յայտնենք որ Ս. Պետրոս հրապարակի մսուրի շինութեան եւ տօնածառի բարձրացումին սովորութիւնը սկիզբ առած է 1982-ին։ Յառաջիկայ 13 դեկտեմբերին, ֆրանչիսկոս Քահանայապետը պիտի ընդունի 2013-ի տօնածառի նուիրատուները։