Папата на Ангел Господов: Во Исус Христос Објавата го најде своето исполнување
Папата Фрањо во недела 1 декември пред верниците собрани на плоштадот Свети Петар,
кои и покрај ладното и ветровито време дојдоа во голем број, ја објасни смислата на
времето на Исчекување (Адвент) и ја повика светската јавност, посебно здравствените
лица, да овозможат здравствена помош на лицата заразени со вирусот ХИВ. Во првата
недела од Божиќниот пост – Исчекување, својот говор пред молитвата Ангел Господов
Светиот Отец ја започна со зборовите: Божјиот народ започнува одново да оди со Исус
Христос, нашиот Пастир, кој нѐ води низ историјата, кон исполнување на Божјото царство.
Коментирајќи
од Книгата на пророк Исаија (Исаија 2,2-3), Папата го спореди тоа заедничко ходочастие
со универзалното поклонение кон заедничката цел, која во Стариот Завет е Ерусалим,
местото на Господовиот храм, бидејќи од него дојде објавата на Божјото лице и неговиот
закон. Во Исус Христос, Објавата го најде своето исполнување, а храм Господов стана
Тој самиот, Словото стана Тело: Тој е водач и цел на ходочастието на Божјиот народ,
и преку Неговото светло и други народи можат да одат кон Царството на правдата и мирот.
Ова
ходочастие никогаш не завршува – додаде папата Фрањо, бидејќи во животот на секој
човек постои потреба од повторно подигнување и пронаоѓање на целта на сопственото
постоење, така е потребно и во големото човечко семејство обновување на заедничкиот
хоризонт кон кој е упатен, а тоа е хоризонтот на надежта. Времето на Исчекување кое
одново го започнуваме, ни го враќа хоризонтот на надеж; надеж која не разочарува,
бидејќи е втемелена на Словото Божјо – рече папата Фрањо.
Како модел на таквиот
духовен став, таквиот начин на постоење и одење Папата ја истакна Девица Марија, едноставна
селска девојка, која во срцето ја носи целата Божја надеж. Во нејзината утроба се
овоплоти Божјата Надеж, стана Човек, стана историја: Исус Христос. Нејзиното Велича
е песна на Божјиот народ на патот, како и на сите мажи и жени кои својата надеж ја
полагаат во Бог, во моќта на Неговото милосрдие – заврши Папата Фрањо, поттикнувајќи
ги верниците да се препуштат на нејзиното водство во ова време на исчекување и бдение.
По
завршувањето на Ангел Господов, а по повод одбележувањето Светискиот ден за борбата
против ХИВ, Светиот Отец ја искажа својата близина со заразените лица, посебно со
децата, и повика на молитва за сите кои се грижат за нив: мисионери, лекари, истражувачи,
со желба на секој болен, без исклучок, да му се овозможи потребното лекување. На
крајот Папата ги поздрави присутните поклоници од Италија и другите земји.