2013-11-29 10:11:03

Վիլնիուսի Վեհաժողով. Վրաստան Եւ Մոլտաւիա Եւրոպական միութեան հետ ընկերակցութեան համաձայնագիրի թեքնիք նախաստորագրումը կատարեցին


Երէկ Եւրոպական Միութեան Արեւելեան գործընկերութեան Լիթուանիոյ մայրաքաղաք Վիլնիուսի մէջ ընթացք առած վեհաժողովի պաշտօնական մամլոյ հաղորդագրութեան մէջ նշուած է, որ քաղաքական առաջին եւ գլխաւոր հարցը դարձաւ վեհաժողովի նախօրեակին Ուքրանիոյ դիրքորոշման անսպասելի փոփոխութիւնը` աւելցնելով, որ Արեւելեան գործընկերութեան ծրագիրի ապագան չի կրնար եւ պէտք չէ ատոր զոհ երթայ:
Ժողովի նախօրեակին Լիթուանիոյ արտաքին գործոց նախարարութիւնը հերքած էր այն տեղեկութիւնները, թէ Վիլնիուսի մէջ հակառուսական հռչակագիր մը պիտի որդեգրուի: ԻԹԱՐ-ԹԱՍՍ հաղորդած էր, որ լիթուանական կողմը պատրաստած է հակառուսական հռչակագիր մը, որուն մէջ Եւրոպական Միութեան անդամ երկիրներուն կ՛առաջարկէ դատապարտել Ռուսիոյ կողմէ իր դրացի երկիրներուն դէմ գաղութատիրական ճնշումները, ինչպէս նաեւ` աջակցութիւն յայտնել դէպի Եւրոպա ձգտող Ուքրանիոյ ժողովուրդին:
Վիլնիուսէն հաղորդում կատարող վրացական պատկերասփիւռի կայանները յայտնեցին, որ Վիլնիուսի մէջ տեղի ունեցած է Վրաստանի` Եւրոպական Միութեան հետ Ընկերակցութեան համաձայնագիրի թեքնիք նախաստորագրումը: Վրացական կողմէն նախաստորագրումը կատարած է արտաքին գործոց առաջին փոխնախարար Տաւիտ Զալքալիանին, որ վերջին երեք տարիներուն գլխաւորած է Եւրոպական Միութեան հետ բանակցութիւններուն մէջ երկրի պատուիրակութիւնը:
Հազար էջէ բաղկացած համաձայնագիրի թեքնիք նախաստորագրումը սկսելէ առաջ Զալքալիանին վրացի լրագրողներուն ըսած է, որ այդ փաստաթուղթի նախաստորագրումը «Վրաստանի համար պատմական իրադարձութիւն է»:







All the contents on this site are copyrighted ©.