Fillon misioni shëndetësor i Selisë së Shenjtë për fëmijët sirianë, refugjatë në Liban
U paraqit sot në Vatikan, misioni shëndetësor për fëmijët sirianë, refugjatë në Liban,
organizuar nga Këshilli Papnor “Cor Unum”, Spitali Pediatrik romak i Krishtit Fëmijë
dhe nga Karitasi i Libanit. Projekti u shpjegua nga kryetari i dikasterit vatikanas,
kardinali Robert Sarah, presidenti i Spitalit Pediatrik, Xhuzepe Profiti, kreu i Karitasit
të Libanit, atë Simon Fadul dhe përgjegjësja e dermatologjisë në Spitalin e Krishtit
Fëmijë, mjekja Mej El Hashem. Kardinali Sarah përvijoi përmasat e misionit: “Mendoni,
me fondet e këtij misioni të rëndësishëm jemi në gjendje, të paktën në çastin e parë,
të ndihmojmë 3-4 mijë fëmijë, duke blerë ilaçet e nevojshme për ta. Afrohet Krishtlindja,
një periudhë në të cilën konsumizmi e mbulon shpesh mesazhin e Lajmit të Lindjes së
Krishtit: ne mendojmë se dhurata më e bukur, që mund t’u bëjmë fëmijëve, të cilët
vuajnë për shkak të luftës siriane, është t’u kthejmë buzëqeshjen, t’u sigurojmë vazhdimësinë
e jetës, duke i shoqëruar jo vetëm materialisht, por edhe nga pikpamja shpirtërore
e njerëzore”. Pas lutjes për Sirinë, me Papën Françesku në Vatikan, Këshilli
Papnor “Cor Unum” ngriti një zyrë informacioni e komunikimi në Bejrut, falë së cilës
dihet se Kisha Katolike ka shpenzuar deri tani 78 milion dollarë për ndihma në fushën
shëndetësore, të arsimit, të ushqimit e në ndihma për të moshuarit. Institucionet
kishtare, që veprojnë në 20 qytete siriane, janë mëse 62, të cilat kanë marrë fonde
nga 42 organizma katolike. Pikërisht kjo zyrë, dashur nga Ati i Shenjtë, është në
gjendje t’i japë tani Kishës direktiva për ndërhyrjet e mëtejshme. Por cila është
situata? Sërish kardinali Sarah: “Sipas informatave tona, janë mëse 2 milion
refugjatë sirianë, të shpërndarë sidomos në vendet e Lindjes së Mesme e të Mesdheut.
Prej tyre, 800 mijë ndodhen në Liban, 515 mijë në Jordani, 460 mijë në Turqi. Me shqetësim
e dhimbje të madhe, vërejmë se rreth 52% e tyre janë fëmijë e të rinj nën 17 vjeç”. Pikërisht
për këtë arsye, përpjekjet e Këshillit Papnor “Cor Unum” synojnë të çojnë në Liban,
ku numri i refugjatëve është më i madh, kura pediatrike. E shpjegoi këtë, presidenti
i Spitalit të Krishtit Fëmijë, Xhuzepe Profiti: “Në Liban, në bashkëpunim me
Karitasin libanez dhe me ‘Cor Unum’, Spitali do të japë ndihmesën e vet, në rajonin
e Bekaa-së, për kontrollin mjekësor të fëmijëve dhe shpërndarjen e ilaçeve falas.
Projekti parashikon mbështetjen e Karitasit, duke financuar një mjek dhe një infermier
vendas, të cilët do të shkojnë në kampet e refugjatëve të zonës, duke ofruar shërbime
për gratë dhe fëmijët”. Vetë kardinali Sarah lajmëroi se nga 4 deri më 8 dhjetor,
së bashku me Sekretarin e Këshillit Papnor “Cor Unum”, imzot Xhampjetro Dal Tozo,
do të shkojë vetë në Liban për të verifikuar zhvillimin e këtij misioni shëndetësor,
i cili do të fillojë në dhjetor e do të zgjasë fillimisht tre muaj.