“Радасць Евангелля
напаўняе сэрцы і жыццё тых, хто сустракаецца з Хрыстом”, - такімі словамі пачынаецца
першая Апостальская адгартацыя папы Францішка “Evangelii gaudium” (Радасць Евангелля),
прэзентацыя якой праходзіць 26 лістапада 2013 г. у Зале Друку Апостальскай Сталіцы.
У дакуменце Папа развівае тэму абвяшчэння Добрай навіны ў сучасным свеце, абапіраючыся,
між іншым, на спадчыну Сінода Біскупаў па новай евангелізацыі, які прайшоў у Ватыкане
7-28 кастрычніка 2012 г. Тэкст пачынаецца і заканчваецца заклікам “аднавіць арыгінальную
свежасць Евангелля”, знаходзячы “новыя шляхі”, “крэатыўныя метады” і не знявольваючы
Езуса ў нашых “нудных схемах”. Неабходна “душпастырскае і місійнае навяртанне, якое
не павінна пакінуць рэчы такімі, якімі з’яўляюцца сёння”, а таксама “рэформа стурктураў”
Касцёла, каб “станавіліся больш місійнымі”. У гэтым абнаўленні, на думку Святога Айца,
не трэба баяцца пераглядзець звычаі Касцёла “не звязаныя непасрэдна з цэнтрам Евангелля”,
а “укаранёныя на працягу гісторыі”.
Францішак заклікае “трымаць паўсюль дзверы
касцёлаў адкрытымі”, каб тыя хто праходзіць каля іх не сустрэлі “холаднасць закрытых
дзвярэй”. Тое самае тычыцца душпастырства ў розных сферах, у тым ліку сакрамэнтальнай.
Паводле Папы, Эўхарыстыя павінна быць “не ўзнагародай для дасканалых, а шчодрым лекам
і пасілкам для слабых”. Святы Айцец паўтарыў сваё жаданне бачыць Касцёл “параненым
і запэцканым з-за таго, што выйшаў на вуліцы”, чым “заклапочаным знаходжаннем ў цэнтры”.
У першую чаргу Касцёл павінна турбаваць тое, што многія нашы браты жывуць без сяброўства
з Езусам, перакананы Пантыфік.
Асаблівым чынам Папа заклікаў касцёльныя супольнасці
не паддавацца спакусам нянавісці і зайздрасці: “пасярод Народа Божага і ў розных супольнасцях,
колькі войнаў!”. “Каго хочам евангелізаваць такімі паводзінамі?”, - пытаецца Святы
Айцец. Ён адзначчае неабходнасць пашырэння адказнасці свецкіх вернікаў, якія адкінуты
на “ўзбочыны рашэнняў” “празмерным клерыкалізмам”.
Францішак асаблівым чынам
закрануў тэму прапаведвання. Паводле яго, гаміліі “павінны быць кароткімі” і не падобнымі
на “канферэнцыі ці лекцыі”. Трэба быць здольнымі казаць словы, якія “запальваюць сэрцы”.
Святы Айцец падкрэсліў важнасць падрыхтоўкі гамілій: “прапаведнік, які не рыхтуецца
не з’яўляецца “духоўным”, але нясумленным і безадказным”, лічыць Папа. Гамілія, паводле
яго, павінна даваць надзею, а не пакідаць “нявольнікамі негатыва”. Само абвяшчэнне
Евангелля, павінна мець пазітыўныя характарыстыкі: “блізкасць, адкрытасць на дыялог,
цярплівасць, сардэчнасць, якая не асуджае”.
Гаворачы пра актуальныя выклікі,
Папа крытычна ахарактарызаваў пануючую эканамічную мадэль, “несправядлівую ў карані”,
якая “забівае” таму што ў ёй пераважае “закон самых моцных”. Касцёл, на яго думку,
павінен актыўна уключыцца ў абарону бедных. “Пакуль не вырашацца праблемы бедных,
не вырашацца праблемы свету”, - адзначае Святы Айцец. Сярод самых безабароных і слабых,
Папа назваў таксама ненароджаных дзяцей, у якіх сёння жадаюць “адабраць чалавечую
годнасць”.
У евангелізацыі, паводле Францішка, важную ролю грае супрацоўніцтва
з іншымі рэлігіямі, дзякуючы якому можна ўзаемна ўзбагачацца. Папа заклікае не апускаць
рукі перад абліччам няўдачаў ці невялікіх вынікаў працы, памятаючы, што заўсёды важным
з’яўляецца “дар самаго сябе”.