Папа: адзінства з Біскупам Рыма для Усходніх Цэркваў стала дарам Святога Духа
Святы Айцец выказаў
вялікую павагу да “духоўнай спадчыны хрысціянскага Усходу”. Ён лічыць, што “адзінства
з Біскупам Рыма” і “касцёльная камунія”, якія былі ўласным выбарам Усходніх Цэркваў,
сталі для іх “дарам Святога Духа”. Пантыфік нагадаў, што гэта ўсё нясе з сабой абавязак
умацавання еднасці і салідарнасці ўнутры саміх Патрыярхальных Сінодаў. Папа Францішак
сустрэўся 21 лістапада 2013 г. у Ватыкане з Патрыярхамі і Вярхоўнымі архіепіскапамі
Усходніх Каталіцкіх Цэркваў. Пантыфік заклікаў да адзінства паміж епіскапамі, святарамі
і вернікамі. Ён лічыць, што іерархі павінны разумець і падтрымліваць сваіх святароў.
Папа звярнуў увагу на патрэбу празрыстасці ў кіраванні царкоўнай маёмасцю і адкрытасці
на патрэбы іншых. Ён прызнаўся, што рэалізацыі ўсяго гэтага можа паспрыяць прынцып
сінадальнасці, “які з’яўляецца адметнай рысай Усходніх Цэркваў”.
Святы Айцец
папрасіў іерархаў маліцца за яго і засведчыў сваю адкрытасць на іх прапановы адносна
жыцця і дзейнасці Касцёла.