Papa me Patriarkët e Kishave Lindore Katolike: jepini përparësi bashkëpunimit dhe
kolegjialitetit
Sot paradite Papa takoi në Vatikan Patriarkët e Kishave Lindore Katolike dhe Arqipeshkvinjtë
e Lartë. Në fillim Papa iu trejtua të pranishmëve me këto fjalë: “Ju pres me gëzim
e frymë vëllazërore në këtë takim, në të cilin për herë të parë kam rastin të rri
me Etërit dhe Kryetarët e Kishave Lindore Katolike. Përmes fytyrave tuaja shoh Kishat
tuaja dhe dëshiroj, para së gjithash, t’ju siguroj për afërsinë dhe lutjet e mia për
grigjën që Zoti Jezus i ka besuar secilit prej jush. Thërras në ndihmë Shpirtin e
Shenjtë, që të na tregojë gjithçka duhet të mësojmë e të zbatojmë së bashku, për t’i
shërbyer besnikërisht Zotit, Kishës së tij dhe mbarë njerëzimit”. “Kjo mbledhje
më jep mundësinë të shpreh vlerësimin e lartë për pasurinë shpirtërore të Lindjes
së krishterë dhe më sjell ndër mend çfarë ka thënë fort i dashuri Benedikti XVI rreth
figurës së Kryetarit të një Kishe, në Thirrjen post-sinodale Kisha në Lindjen e Mesme:
ju jeni – thoshte Benedikti – ‘rojtarët syçelë të bashkësisë dhe shërbëtorët e bashkimit
kishtar” (n.40). Ky bashkim, që jeni të thirrur të realizoni në Kishat tuaja, duke
iu përgjigjur dhuratës së Shpirtit të Shenjtë, shprehet në mënyrë të natyrshme dhe
të plotë në ‘bashkimin e pamungueshëm me Ipeshkvin e Romës’ (po aty), i cili është
i themeluar në bashkësinë kishtare, që keni marrë kur jeni zgjedhur. Përfshirja në
bashkësinë e tërë Trupit të Krishtit na bën të vetëdijshëm se kemi për detyrë të përforcojmë
bashkimin dhe solidaritetin në gjirin e sinodeve të ndryshme patriarkale, “duke privilegjuar
gjithnjë bashkërendimin mbi çështje, që kanë rëndësi të madhe për Kishën, në perspektivën
e veprimit kolegjial e përbashkues”. Pastaj Papa Françesku shtoi: “Që dëshmia
jonë të jetë e besueshme, jemi të thirrur të kërkojmë gjithmonë ‘drejtësinë, përshpirtërinë,
fenë, dashurinë, durimin dhe butësinë’ (po aty.; shih 1Tm 6,11); jemi të thirrur të
jetojmë me thjeshtësi, sipas shembullit të Krishtit, që është varfëruar për të na
bërë të pasur me varfërinë e tij (shih 2Kor 8,9): jemi të thirrur të jemi të zellshëm
e të palodhur dhe të ushtrojmë dashurinë vëllazërore e atërore, që presin prej nesh
ipeshkvinjtë, meshtarët e besimtarët, veçanërisht nëse janë të vetmuar e të mënjanuar.
Kam në mendje, mbi të gjitha, meshtarët tanë, që kanë nevojë për mirëkuptim e mbështetje
edhe personale. Ata kanë të drejtë të marrin prej nesh shembullin e mirë për gjërat
që kanë të bëjnë më Hyjin, sikurse edhe në çdo veprimtari tjetër kishtare. Na kërkojnë
të mos fshehim asgjë në administrimin e të mirave e të jemi të kujdesshëm ndaj çdo
dobësie dhe nevoje. “ Papa përfundoi duke thënë: “Me ndihmën e Hyjit dhe të Nënës
së Tij të Shenjtë, e dimë se është e mundur t’i përgjigjemi kësaj thirrjeje. Ju kërkoj
të luteni për mua. Dhe tani mund të dëgjoj me vëmendje atë që doni të më komunikoni
dhe ju shpreh që tani mirënjohjen time.”