Kush ishte Motra Nazarena e Jezusit, sot në qendër të vëmendjes në takimin e Papës
Françesku me simotrat e saj vetmitare? E pse duhet njohur historia e saj, që të duket
sikur del nga kuvendet mistike mesjetare. E pra i përket kohëve moderne. Murga vetmitare
jetoi në kohën tonë! Prej këndej, historia e saj zgjon një interes të madh për të
gjithë ata, që mendojnë se figurat e kësaj natyre i takojnë tashmë kohëve të perënduara,
që nuk përsëriten më. Në të vërtetë përsëriten, duke na treguar shpesh rrugën që çon
tek lumturia, aq e kërkuar. Ajo është bashkëudhëtare me ne. Në shekull Julia
Krota (Glastonbury, Connecticut, 1907–Roma, 1990), motër Nazarena ishte bijë e një
familjeje fshatare të emigruar në Amerikë nga Piaçenca. Ajo mundi të diplomohej në
konservator e të laurohej në letërsi, duke i jetuar 30 vjetët e para të jetës ndërmjet
këtyre dy arteve. Vajzë e re, plot gjallëri, e emancipuar dhe e mësuar, ajo e kishte
siguruar vijimin e studimeve duke e mbajtur veten me punë nga më të ndryshmet. Kishte
punuar edhe si balerinë në lokalet e Nju Jorkut, tepër larg ekstazave mistike e vegimeve,
që do ta shoqëronin më pas gjithë jetën, siç lexojmë në librin shkruar nga biografi
i saj, Thomas Matus. Ishte një metër e 80 e gjatë, me trup të lidhur, dashuronjëse
e sporteve, posaçërisht e basketbollit, gazmore e në kërkim të vazhdueshëm të shoqërisë.
Në moshën 26 vjeçare, vajza jetoi disa çaste, që ia ndryshuan plotësisht rrugën
e jetës. Natën ndërmjet së Premtes e së Shtundës së Madhe të vitit 1934 mbeti vetëm
në kapelën e errët të kolegjit universitar, ku mësonte. Pas disa orësh kaluar në heshtje
e në errësirë, ndjeu Dikënd që po e thërriste me emër. Dikush e ftonte për ta ndjekur
në shkretëtirë: atë ças ajo pa dashurinë. Nuk kishte provuar kurrë një dashuri aq
të madhe, që e pushtoi përgjithnjë. Pas këtij çasti tronditës, nisi të shkojë vazhdimisht
në kishë e të praktikojë ushtrimet shpirtërore, gjithnjë më e vendosur të ndjekë jetën
vetmitare, që të çon në shkretëtirë. Nuk e pati të lehtë. Nisën ta shikojnë si vajzë
me shpirt jo normal, me prirje për të fantazuar, më shumë se për të parë sy më sy
realitetin. Prej këndej, kur trokiti në kuvendin e karmelitaneve të Njuport, porta
iu hap përgjysëm. Vijoi të trokiste. Në kuvende amerikane e italiane, po nuk u pranua.
Deri në vitin 1945, kur arriti në Romën e uritur e të pushtuar e trokiti në kuvendin
e varfër kamaldolez të Aventiniut, në të cilin prania e saj e heshtur e plot dashuri
për të gjithë, kujtohet edhe sot e kësaj dite si ndihmesa më e madhe në jetën shpirtërore
të bashkësisë. Figurë me ngarkesë emocionale, kjo e murgeshës vetmitare. Simbol
i gjallë i përvojës së klauzurës: abstrakte, si dashuria; konkrete, si vuajtja. Duke
lexuar letrat e murgeshës, shkruar atit të saj shpirtëror, të cilat simotrat e saj
ia dorëzuan sot Papës Françesku, për vizitë në kuvendin e tyre, mësojmë çdo të thotë
inteligjenca e dashurisë, që e bën njeriun të aftë të ndryshojë vazhdimisht e t’ia
hapë plotësisht zemrën tjetrit. Në një nga letrat e vetmitares, shkruar në vitin 1997,
lexojmë: “Ndoshta jeta ime e varfër, e fshehur, shterpe, e shkapërdedhur në përpjekjen
për t’u dukur, ia hapi shpirtit tim portat e amshuara”. Nisi, kështu, të jetojë në
korpin e vet, jetën e njerëzve të varfër, të shfrytëzuar, viktima të luftërave e të
mohimeve të padrejta. Derisa u kthye në skelet. U mbyll e tëra në zemrën e Zotit.
Në heshtje të thellë. U mbyll në Të e me Të. E duke u mbyllur kështu, e ndjeu vetën
më afër të gjithëve, me dëshirën për t’i ndihmuar, pa i parë frytet e lutjes e të
jetës së vet vetmitare, jetë feje, e pastër, e zhveshur nga gjithçka, e flijuar, pa
shikuar para as mbrapa, e dhuruar për dashuri. Është një shembull më shumë i lirisë
femërore. Që beson se Zoti e shikon botën, shikon në thellësinë e shpirtrave, duke
vlerësuar çdo gjë, sado të vogël, që bëhet në emër të Tij e për dashuri të Tij e duke
ta mbushur shpirtin me paqe! Në vitin 1959, në një qeli 5 metra me 3, rregulluar
sipas dëshirës, Julia Krota gjeti, mbi kodrën e Aventinit, ‘shkretëtirën’ e saj, atë
që kishte parë në kapelën e kolegjit, kur ndjeu zërin, që e thërriste...