Papa Françesku takohet me atë Chiera-n, engjëll roje i ‘meninos de rua”
Në Meshën e sotme, kremtuar në Shtëpinë e Shën Martës, mori pjesë edhe atë Renato
Chiera, themelues i “Casa de menor”(Shtëpia e të miturve), në Rio-de-Janeiro, që prej
më se 40 vjetësh pranë fëmijëve të pa strehë të Brazilit. Për atë Renaton, shembull
i bariut ‘që i vjen era dele’, takimi me Papën Françesku ishte çast tejet prekës e,
njëkohësisht, edhe inkurajim i madh për ta vijuar misionin e tij në periferitë e jetës,
në Brazil. Menjëherë mbas Meshe, i drejtuam mikrofonin tonë. Ta dëgjojmë Atë Renato
Chiera-n, që na përgjigjet tejet i emocionuar:
Përgjigje: -
Emocion i madh, që e kam edhe tani, kur po flas. Papa më duket si të ishte vetë Jezusi,
i gjallë mes nesh, që vjen ndërmjet njerëzve, që përkulet mbi plagët e njerëzimit.
Gjatë Meshës pashë edhe thellësinë e takimit të Atit të Shenjtë me Zotin, në një formë,
që më preku jashtëzakonisht. Pastaj, çasti tjetër i gëzimit, kur munda t’i paraqes
punën tonë të vogël, Shtëpinë e të Miturve. T’ia paraqes Kishës, e me të, vetë Jezusit,
atë që po përpiqemi të bëjmë në rrethinat e Rios, pranë fëmijëve të padëshiruar, të
padashur. Papa na nxit gjithnjë të dalim rrugëve, të shkojmë në periferitë, në skutat
e skajet e jetës. E unë mund të them se e bëj këtë prej 36 vjetësh. E ndjej se Zoti
do pikërisht këtë.
Pyetje: - A ju tha ndonjë fjalë të veçantë Papa,
kur u takua me ju, pas Meshe? Sidomos, për fëmijët e rrugëve, që ju i mblidhni nën
strehën e “Casa do menor”?
Përgjigje: - I dhashë librin
tim ‘Prania’, e ai më tha: “Ah! Prania!”. E unë: “Ju jeni prani dashurie! E më thoni:
‘Lutuni për mua!”. Kur i thashë se punoj në periferi, me fëmijët e rrugëve, ai u përgjigj:
“Punë e bukur, punë shumë e bukur”. Pastaj i paraqita letrat e fëmijëve e i tregove
se duam të bëjmë një ‘kupë të botës’, me të rinjtë e pastrehë, që kanë hyrë në rrugë
të re, një kupë alternative. E shtova: “Kemi nevojë edhe për ndihmën tuaj. Është e
shkruar edhe në një nga letrat, që kam këtu me vete”. Pastaj, si me shaka, shtova:
“Shiko, Atë i Shenjtë, edhe unë jam piemontez, si ju, nga një vend pranë Astit, prandaj
ju solla një shishe verë Asti e një torrone Albe”. E ai qeshi. Pastaj mora guximin
e i thashë: “A mund t’ju jap një përqafim brazilian?”. Mora përgjigjen: “Po”. E atëherë
e rroka fort dhe e falënderova për vizitën në Brazil, ku Papa e kuptoi se për të hyrë
në gjirin e popullit brazilian, duhet kaluar nëpër zemër.
Pyetje: -
Çfarë do t’u çoni nga ky takim, fëmijëve dhe të rinjve të rrugës? Përgjigje:
- Do t’u çoj dashurinë e Zotit për ta, përmes dashurisë, që tregoi Papa
me përqafimin, me bekimin e tij. Këta fëmijët tanë, të rinjtë tanë, siç e kam thënë
shumë herë, e nuk ngurroj ta përsëris, mbi të gjitha kanë nevojë për dashuri. Duhen
dashur. Kisha, përmes Papës me mish e gjak, është dashuria e Hyjit për ta. E dukshme.
E prekshme. E kjo është dhurata më e madhe, që dua t’u çoj.