Святы Айцец: Бог мае слабасць да пакорнай малітвы чалавека
Малітва чалавека і
слабасць Бога былі ў цэнтры гаміліі папы Францішка падчас ранішняй Эўхарыстыі ў Доме
св. Марты 16 лістапада 2013 г. Пантыфік звярнуў увагу на прыклад евангельскай удавы,
якая настойліва прасіла суддзю аб справядлівасці, і нагадаў заклік Езуса да вучняў
– нястомна маліцца. “Бог учыніць справядлівасць сваім абраным, якія днём і ноччу просяць
Яго”, - сказаў Святы Айцец, падкрэсліўшы, што так здарылася з яўрэйскім народам, які
быў вызвалены з егіпецкага палона. Францішак нагадаў, што “Пан пачуў малітву свайго
народа, бо ў сэрцы адчуваў, што яго абраныя пакутавалі”. Перад абліччам гэтага, Ён
праявіў сваю моц і вызваліў іх. “Гэта моц Бога. А якая сіла ў людзей?”, - спытаў Панітыфік.
На яго думку, сіла чалавека заключаецца ў тым, каб нястомна стукаць у сэрца Бога,
апавядаць яму пра свае праблемы, цяжкасці, пакуты, грахі і прасіць вызвалення ад іх.
“Сіла чалавека – гэта малітва”, - сказаў Папа і дадаў, што да яе Бог мае слабасць.
У
літургіі са Святым Айцом прынялі ўдзел канонікі капітулы базылікі св. Пятра. Звяртаючыся
да іх, Францішак адзначыў, што іх праца павінна заключацца менавіта ў тым, каб стукаць
у сэрца Бога і прасіць за Яго народ. Паводле Папы, канонікі базылікі, “самай блізкай
да Папы”, “якой дасягаюць усе малітвы ў свеце”, павінны “збіраць іх і прадстаўляць
Пану”. “Гэта паўсюднае служэнне, служэнне Касцёлу”, - сказаў Святы Айцец.
Папа
адзначыў, што такое служэнне з’яўляецца “прывілеяваным” і выказаў прысутным падзяку
за яго. Папа яшчэ раз заклікаў памятаць, што Бог моцны і можа змяніць усё, але адначасова
мае слабасць да пакорнай малітвы свайго народа.