Կեսարիոյ Ս. Աստուածածին եկեղեցին կ’օգտագործուի իբրեւ մարզասրահ
Արեւմտեան Հայաստանի Կեսարիա քաղաքի Ս. Մարիամ Աստուածածին եկեղեցին մօտ 40 տարիէ կ’օգտագործուի
իբրեւ մարզասրահ: Ըստ «Երկիր»-ի, Agos.com-ը կը յայտնէ, որ եկեղեցւոյ վերանորոգման
աշխատանքներուն մասին հանրութեան տեղեկացնելու համար տեղադրուած պաստառը դժգոհութիւններ
յառաջացուցած է: Ըստ «Kayseri olay» թերթին` «եկեղեցիի վերանորոգում» պաստառին շուրջ
քննադատութիւններուն պատճառով քաղաքապետարանը փոխած է զայն «մշակոյթի եւ արուեստի կեդրոնի
աշխատանքներ» պաստառով: Այս թեմային վերաբերեալ «Ակօս» պարբերականին հետ զրուցած է
Կեսարիոյ քաղաքապետարանի ներկայացուցիչներէն Համտի Էլճումանը: «Իբրեւ մարզասրահ օգտագործուող
Ս. Մարիամ Աստուածածին եկեղեցին վերանորոգումէն ետք պիտի դառնայ մշակոյթի եւ արուեստի
կեդրոն: Քանի որ եկեղեցւոյ ճարտարապետութիւնը կը պատկանի հայու, այդ պատճառով վերանորոգման
համար Պոլիսէն հայ ճարտարապետի մը հետ պայմանաւորուած ենք»,- ըսած է Էլճումանը: Նշենք,
որ 2008 թուականին Կեսարիոյ մէջ դարձեալ նման դէպք մը պատահած էր. «Անատոլիա» վաւերագրական
շարժանկարի նկարահանումներուն համար Կեսարիա ժամանած շարժանկարին աշխատակազմը պատմական
Կեսարիա ամրոցին վրայ խաչով դրօշ ծածանած էր` ի նշան անոր բիւզանդական ըլլալուն: Բողոքներու
հետեւանքով խաչով դրօշը իջեցուցած էին, եւ շարժանկարի աշխատակազմը լքած էր Կեսարիան: