Агульнабеларуская сустрэча святароў: моц – у еднасці Касцёла
Адчуць еднасць Касцёла
і моц супольнай малітвы – у Мінску праходзіць Агульнабеларуская сустрэча святароў.
Пастырскія спатканні ў дыяцэзіях адбываюцца кожны месяц, а форум у нацыянальным маштабе
– другі па ліку. Бачыць адзін аднаго, чуць адзін аднаго, разам маліцца і разам вырашаць
пытанні, якія сёння стаяць перад Касцёлам – сустрэча павінна прынесці як духоўныя,
так і практычныя вынікі, і, магчыма, стаць традыцыйнай. Ідэя правесці Агульнабеларускую
сустрэчу нарадзілася падчас Году святарства, тады і адбылася першая, а зараз, ужо
ў канцы лістапада, завяршаецца Год веры. І тэма гэтай сустрэчы пераклікаецца з яго
дэвізам – “Святло веры – святарская вернасць”.
Вернасць Богу, вернасць Касцёлу,
вернасць сваёй пастве – на сустрэчы закранаюцца самыя розныя аспекты святарскага служэння:
ад літургічных пытанняў да выклікаў новага часу, паведаміў арцыбіскуп Тадэвуш Кандрусевіч,
мітрапаліт Мінска-Магілёўскі. “Кожны час нясе новыя праблемы, гэта выклікі часу, на
якія трэба адказваць: малая колькасць касцёлаў, справа паклікання да святарства і
манаскага жыцця, пытанне мас-медыя, праблема сект і акультычных напрамкаў, якія прыходзяць
у жыццё людзей і не абыходзяць католікаў. На гэта таксама трэба адказваць і мець вочы
расплюшчанымі. Праблемы экуменізму, пытанне супрацоўніцтва з іншымі канфесіямі – у
нас на добрым узроўні, але трэба гэта выкарыстоўваць”, -адзначыў іерарх.
У
сталіцы, у Чырвоным касцёле, сабраліся больш за 200 святароў з усіх дыяцэзій Беларусі.
Галоўныя тэмы абмяркоўваюць падчас круглых сталоў. Калі для Касцёла існуюць глабальныя
пытанні, то ў кожнага святара – пробашча ці вікарыя, з абласнога цэнтра ці маленькай
вёскі – свае задачы ў паўсядзённым жыцці і працы з парафіянамі, адзначыў кс. Алег
Буткевіч, пробашч парафіі св. Антонія Падуанскага з Віцебску. “ У сітуацыі, калі Касцёл,
можна так сказаць, яшчэ будуецца і адраджаецца, аднаўляе свае структуры, важным заданнем
з’яўляецца не згубіць сваёй тоеснасці. А ў працы з людзьмі важна, каб Касцёл адпавядаў
запатрабаванням чалавека сучаснага свету. Пытанняў сапраўды вельмі шмат і напэўна
адным такім спатканнем іх нельга ахапіць і вырашыць. Але гэта сустрэча дапаможа ў
гэтых важных пытаннях зрабіць крок наперад”, - лічыць святар.
Праца з моладдзю,
душпастырства сем’яў, дапамога тым, хто жыве ў нястачы – малое кола дзейнасці кожнага
святара. Але асабліва акцэнт сёння робіцца на супрацоўніцтве святароў са свецкімі
людзьмі. Кс. Аляксандр Яшэўскі, настаяцель салезіянскай супольнасці ў горадзе Смаргонь,
на Агульнабеларускай сустрэчы ўзначаліў размову на гэту тэму, каб яшчэ раз задумацца
– дзеля каго існуе Касцёл. “Я бачу ў нашай сітуацыі гэту неабходнасць адкрывацца нам
святарам на тое, што думаюць, што прапануюць нашы вернікі. Бывае вельмі часта мы вырашаем
пытанні, выказваем нейкія дырэктывы, часам не ўлічваюцы іх голас. У нас ёсць парафіяльныя
рады, камітэты, іншыя групы, на якія варта звярнуць увагу, таму што свецкія вернікі
маюць шмат чаго добрага нам сказаць і шмат добрых прапаноў. Мне здаеца, гэта тэма
вельмі актуальная”, - перакананы салезіянін.
Акрамя духоўнага імпульсу, новых
ідэй і задач, вынікам Агульнабеларускай сустрэчы стане шэраг канкрэтных душпастырскіх
прапаноў – можна сказаць кіраўніцтва да дзеяння. Яны будуць выкарыстаны для падрыхтоўкі
душпастырскіх праграм на наступны год у кожнай дыязэзіі.