Filipine: Imzot Tejado: rrjeti vigan i ndihmave, bashkon Kishat e mbarë botës
Kisha mbarë është mobilizuar për të ndihmuar popullsitë e Filipineve, të rrënuara
nga tufani. Duke iu përgjigjur thirrjes së Papës, Konferencat ipeshkvnore të mbarë
botës, po organizojnë fushata solidariteti; në Itali, mbledhja e ndihmave do të bëhet
në të gjitha Kishat e vendit, të diel, më 1 dhjetor. Ndërkaq, bilanci i viktimave
e ka kaluar numrin 3.600, pa llogaritur, këtu, të humburit e shumtë. Në vend ndjehet
fort frika e epidemive. Për ndihmat e Selisë së Shenjtë, intervistuam imzotin Segundo
Tejado Muňoz, zëvendës-sekretar i Këshillit Papnor Cor Unum:
Përgjigje:
- Siç e dini mirë, Cor Unum është dikaster i Selisë së Shenjtë, i ngarkuar për
ndihmat humanitare, por edhe dikaster i bamirësisë së Papës. Nisëm menjëherë një ndihmë
të parë emergjence, 150 mijë dollarë, thjesht si shenjë e pranisë shpirtërore të Atit
të Shenjtë, që e kujtoi këtë në audiencën e përgjithshme të së mërkurës, por edhe
gjatë lutjes së Engjëllit të Tënzot. Ja, pra, kjo ndihmë u dërgua si shprehje e afërsisë
së Atit të Shenjtë dhe e gjithë Kishës universale, për njerëzit, që po vuajnë nga
kjo fatkeqësi e natyrës.
Pyetje: - Si po punojnë agjencitë katolike
të botës, të gjitha të mobilizuara për nisjen e ndihmave drejt Filipineve?
Përgjigje:
- Është kontribut, që jep gjithnjë Kisha në raste të tilla. Pjesa më e madhe
e ndihmave niset nga Kishat vendase, nga Karitaset vendase; por nuk janë vetëm Karitaset.
Ka edhe shumë agjenci kombëtare e dioqezane, që mbledhin fonde e nisin të lëvizin
në këtë drejtim. Siç e dini, Konferenca ipeshkvnore italiane, përmes komitetit të
saj për ndërhyrje bamirëse, ka dërguar deri tani 3 milionë euro. Pastaj, karitaset
kanë dërguar fonde të tjera e në vend kanë arritur shumë njerëz, që po ndihmojnë për
t’i përdorur sa më me fryt këto ndihma. Karitasi italian dërgoi 100 mijë euro; Karitasi
spanjoll, ndihma të tjera… Rrjet vigan, ky, që po ndihmon e që koordinohet këtu, në
Karitas Internationalis, në Romë, i cili gjithashtu po lëviz. Arrijnë vazhdimisht
sinjalizime, që flasin për programe, projekte; për persona, posaçërisht, sepse në
këto çaste të vështira, duhen njerëz, për t’i dhënë një dorë të dëmtuarve.
Pyetje:
- Mund të themi, pra, se 150 mijë eurot e Cor Unum janë ndihmë simbolike...
Përgjigje:
- Shenjë e parë, për të treguar se Ati i Shenjtë është pranë filipinasve e se
Kisha është përkrah njerëzve, që vuajnë. Në rastin e krizës siriane, për shembull,
bëmë një vlerësim e pamë se ndihmat e dërguara nga të gjitha agjencitë katolike në
mbështetje të zhvillimit, arrijnë shifrën 80 milion euro e përtej. Mund ta përfytyrojmë,
prandaj, si lëvizin njëkohësisht të gjitha realitetet, që jetojnë në dioqezet e famullitë
e kombeve të ndryshme, në çastin kur del ndonjë problem i këtij tipi. Lëvizin njëherësh,
me vrull të madh e, sidomos, me bujari të madhe.
Pyetje: - A parashikohet
që Cor Unum, në emër të Papës, të shkojë për t’i vizituar zonat e dëmtuara të Filipineve? Përgjigje:
- Këtë e bëjmë gjithnjë: në emër të Atit të Shenjtë ishim në Japoni, pas tsunamit;
në Haiti, kur tronditej nga tërmeti...tani do të shkojmë në Filipine. Nuk mund ta
them se kur, por do të jetë sigurisht para Krishtlindjes, për të çuar një mesazh afërsie,
posaçërisht shpirtërore. Ati i Shenjtë është pranë këtyre popullsive me lutjen e tij.
Kardinali Sarah, kryetar i Këshillit Cor Unum, do të shkojë së bashku me ndonjërin
prej nesh, për t’i vizituar njerëzit, që tashmë po punojnë atje. E natyrisht do të
organizojmë edhe një takim koordinimi, siç bëjmë gjithnjë, me agjencitë, që e kanë
nisur punën në vend. Është çast bashkimi e edhe koordinimi, ky takim, për t’u parë
sy më sy e për t’u çuar atje njerëzve tanë edhe falënderimin e mbarë Kishës e të Atit
të Shenjtë, për punën jo të lehtë, që bëjnë.