Святы Айцец здзейсніў афіцыйны візіт да Прэзідэнта Італіі
14 лістапада 2014
г. папа Францішак наведаў Квірынальскі палац – рэзідэнцыю Прэзідэнта Італьянскай Рэспублікі
Джорджыа Напалітана. Святы Айцец прыбыў сюды у рамках афіцыйнага візіту, каб сустрэцца
з італьянскім палітыкам у адказ на яго візіт у Ватыкан 8 чэрвеня 2013 г. Гэта ўжо
трэццяя сустрэча папы Францішка і Джорджыа Напалітана, але першы візіт, які носіць
статус афіцыйнага. Звяртаючыся да прысутных, Святы Айцец адзначыў, што наведваючы
“сімвалічны дом усіх італьянцаў”, хоча “пастукаць у дзьверы кожнага жыхара гэтай зямлі”,
дзе знаходзяцца карані яго “зямной сям’і”, і “прапанаваць усім аздараўляючае і заўсёды
новае слова Евангелля”. Гаворачы пра развіццё двухбаковых адносін паміж Італіяй і
Апостальскай Сталіцай, Папа нагадаў, што “праз некалькі тыдняў” будзе адзначацца 30-годдзе
Пагаднення аб пераглядзе канкардату, якое з’яўляецца моцнай нарматыўнай базай “для
спакойнага развіцця адносін паміж дзяржавай і Касцёлам у Італіі” і “спрыяе штодзённаму
супрацоўніцтву ў служэнні чалавеку”.
Паводле Францішка, пытанняў, якія маюць
супольны інтарэс, шмат. Сярод іх праблемы, справакаваныя эканамічным крызісам, у першую
чаргу, беспрацоўе. Пантыфік заклікаў “пашырыць намаганні для змякчэння яго наступстваў”.
Францішак
узгадаў пра свае душпастрыскія візіты ў Італіі: на Лампедузу, Сардзінію і ў Асізі.
“У гэтых месцах я дакрануўся да ранаў, ад якіх пакутуе сёння шмат людзей”, - адзначыў
Пантыфік. Ён звярнуў увагу, што ў цэнтры сацыяльных цяжкасцяў знаходзіцца сям’я, якая,
“прапануючы грамадству свае сілы, мае патрэбу ў тым, каб быць ацэненай, паважанай
і абароненай”.
Святы Айцец пажадаў, каб Італія, абапіраючыся на “сваю багатую
спадчыну грамадскіх і духоўных каштоўнасцяў, здолела нанова адкрыць крэатыўнасць і
згоду, неабходныя для яе гарманічнага развіцця”. Пантыфік перакананы, што краіна можа
зрабіць свой значны ўнёсак у супольнае дабро і абарону годнасці кожнага чалавека,
у мір і справядлівасць у свеце.