Мітрапаліт Іларыён: сустрэча з Папам – вялікі крок наперад
Руская Праваслаўная
Царква працуе над набліжэннем сустрэчы паміж Патрыярхам Маскоўскім і Папам, прызнаўся
14 лістапада 2013 г. італьянскай “La Repubblica” Мітрапаліт Іларыён, кіраўнік Аддзела
знешніх царкоўных сувязяў Маскоўскага Патрыярхату. Іерарх знаходзіцца з візітам у
Рыме, у рамках якога сустрэўся з папам Францішкам і прадстаўнікамі ватыканскіх дыкастэрый.
Гаворачы пра перспектыву спаткання Пантыфіка і Патрыярха, Мітрапаліт Іларыён адзначыў,
што “гэта вялікі крок”, над здзяйсненнем якога вядзецца праца. Аднак, паводле яго,
падчас размоў у Ватыкане, канкрэтная дата сустрэчы не абмяркоўвалася. “Над пратаколам
стаіць змест. Затым з’явіцца дата”, - сказаў праваслаўны іерарх.
Журналісты
італьянскага выдання нагадалі, што з боку іерарха выказвалася думка аб магчымасці
правядзення сустрэчы на “нейтральнай” тэрыторыі. У сваю чаргу, Мітрапаліт не назваў
канкрэтнага месца, адзначыўшы, што казаць аб гэтым яшчэ рана. “Мы пакуль не знаходзімся
ў гэтым пункце. Паколькі сустрэча з’яўляецца важным момантам, мы хочам яе добра падрыхтаваць”,
- сказаў ён і дадаў, што, у першую чаргу, неабходна вызначыцца з тэмамі, якія будуць
абмяркоўвацца.
Сярод іх Мітрапаліт Іларыён назваў праблемы сям’і, якія ўжо
абмярковаўліся прадстаўнікамі бакоў. “Таксама ёсць вялікая тэма, якая тычыцца абароны
хрысціян у месцах, дзе яны падвяргаюцца пераследу, напрыклад, Блізкі Усход”, - адзначыў
ён.
На думку Мітрапаліта Іларыёна, ініцыятыва папы Францішка, скіраваць ліст
да Прэзідэнта Расіі з мэтай спыніць вайсковае ўмяшальніцтва ў сірыйскі канфлікт, мела
“вялікі поспех”. “Мы павінны цалкам спыніць бойню хрысціян, там дзе радыкальныя ісламісцкія
групоўкі спрабуюць іх знішчыць. На гэтыя тэмы я размаўляў пазаўчора з Папам”, - прызнаўся
праваслаўны іерарх.