Papa: fryma e kureshtjes na largon nga urtia dhe nga paqja e Hyjit
Shpirti i kureshtjes shkakton pështjellim dhe na largon nga Shpirti i urtisë, që,
përkundër, na jep paqen. Kështu tha Papa sot paradite në Meshën e kremtuar në Shtëpinë
e Shën Martës, në Vatikan. Papa e filloi homelinë, duke komentuar leximin e parë
nga libri i Urtisë, ku përshkruhen ndjenjat që duhet të ketë çdo njeri, nëse dëshiron
të përparojë në mençurinë që jep Shpirti i Hyjit: “Ja çfarë do të thotë të ecësh
në jetë me këtë Shpirt: Shpirti i Hyjit na ndihmon të gjykojmë drejt, të marrim vendime
sipas zemrës së Hyjit. E ky shpirt na jep paqe, gjithmonë. Është Shpirti i paqes,
Shpirti i dashurisë, Shpirti i vëllazërimit. Pikërisht kjo është shenjtëria. Ajo që
Hyj i kërkon Abrahamit: ‘Ec në praninë time e ji i paqortueshëm’ – është kjo gjë,
kjo paqe. Ecja nën shtysën e Shpirtit të Hyjit dhe të kësaj urtie. Ai burrë e ajo
grua që ecin kështu, mund të thuhet se janë një burrë i urtë e një grua e urtë. Burrë
i urtë e grua e urtë, sepse lëvizin nën shtysën e durimit të Hyjit”. Fryma
e pyetjes që ngrihet në Ungjillin e sotëm, tha Papa, është e kundërta e frymës së
urtisë hyjnore, sepse ka brenda ngacmimin e kureshtjes: “Kjo ndodh kur dëshirojmë
të zotërojmë projektet e Hyjit, të ardhmen, gjërat; duam të dimë gjithçka, të marrim
në dorë gjithçka. Farisenjtë e pyetën Jezusin: ‘Kur do të vijë Mbretëria e Hyjit?’
Kureshtarë! Donin të dinin datën, ditën… Fryma e kureshtjes na largon nga Shpirti
i urtisë, sepse marrin rëndësi vetëm hollësitë, lajmet, të rejat e vogla të çdo dite,
ose si do të bëhet kjo gjë? Është ‘si-ja’: është shpirti i ‘si-së’! Dhe fryma e kureshtjes
nuk është frymë e mirë: është fryma e shpërqendrimit, e largimit nga Hyji, fryma e
të folurit me tepri. E Jezusi na thotë edhe një gjë interesante: kjo frymë e kureshtjes,
që është e kësaj bote, na sjell pështjellim”. Papa bën thirrje të jemi të kujdesshëm
e të mos biem pre e shtysave kureshtare për të njohur gjërat e Hyjit, sidomos nuk
duhet të rendim pas vegimtarëve, që marrin letra e mesazhe nga Zoja, sepse “Zoja është
Nënë, na do të gjithëve dhe nuk është drejtoreshë poste, që dërgon mesazhe përditë”.
Kërkimi i këtij lloji lajmesh na largon nga urtia e Ungjillit, i cili na thotë se
Mbretëria e Hyjit është mes nesh. Në përfundim, Papa tregoi një shembull nga jeta
e Shën Terezës së Krishtit Fëmijë, për të vënë në dukje dobinë shpirtërore që sjell
shmangia e frymës kureshtare: “Shën Terezina – Shën Tereza e Jezusit Fëmijë
– thoshte se i duhej të ndalej gjithmonë para frymës së kureshtjes. Kur fliste me
një murgeshë tjetër e kjo murgeshë i tregonte një ndodhi, diçka nga familja, nga njerëzit,
nganjëherë kalonte në një tjetër argument. Dëshironte të njihte si përfundonte tregimi,
por e ndjente se kjo gjë nuk ishte sipas shpirtit të Hyjit, sepse ishte shpirti i
shpërqendrimit, i kureshtjes. Mbretëria e Hyjit është mes nesh: mos kërkoni gjëra
të çuditshme, mos kërkoni gjëra të reja, me mentalitetin e kësaj bote. Ta lejojmë
Shpirtin që të na çojë përpara, me urtinë që është puhizë e dashur. Ky është Shpirti
i Mbretërisë së Hyjit, për të cilin flet Jezusi. Ashtu qoftë!”.