“Brenga ime shqiptare”: libri i Aldo Renato Terrusi-t dëshmon edhe një herë tmerret
e komunizmit në Shqipëri
Komunizmi, persekutimi, burgu i Burrelit, varre qe nuk dihet ku jane, mundime, internime
e tmerre. Të gjitha këto fjalë, në dukje të vjetra, por jo të harruara, mbushën dje
një sallë të komunës së Romës, në qendër të kryeqytetit italian, ku Aldo Renato Terrusi
paraqiti përkthimin në shqip të librit të tij “Ritorno al Paese delle Aquile” (Kthimi
në vendin e shqiponjave). I ndryshëm titulli në shqip, por më domethënës. Libri “Brenga
ime shqiptare” tregon fatin e një familjeje italiane, e cila përfundoi në Shqipëri,
gjatë kohës kur vendi ishte protektorat i Italisë; punoi për atë vend, por menjëherë
pas ardhjes së komunistëve në pushtet, mori pjesë në kalvarin e persekutimit shqiptar. Libri është një
shtegtim në kërkim të origjinës dhe historisë së Aldo Renato Terrusit, i cili lindi
në Shqipëri. Aldo ishte kërthi, kur regjimi i Enver Hoxhës ia burgosi të atin në burgun
famëkeq të Burrelit, ku edhe vdiq, pa mundur t’i jepte përshëndetjen e fundit të birit
dhe të shoqes, riatdhesuar në Itali. Me këtë libër, Aldo e bën lexuesin të rijetojë
ngjarjet dramatike të faqes historike më të zymtë të vendit të shqiponjave. Ta dëgjojmë
në mikrofonin e Klaudia Bumçit… Është historia e një familjeje, që ka kaluar
nga Egjipti, në Turqi, në Greqi e pastaj në Shqipëri, ku mendonin se ishin të sigurtë,
për shkak të protektoratit italian. Fatkeqësisht, qëlluan në Gjirokastër, ku nëna
ime, Aurelia u njoh me Enver Hoxhën. Ajo ishte 17 vjeçe e ai djalë 25 vjeçar, prandaj
iu afrua për të dalë me të e madje u prezantua edhe me familjen. Por si nëna ime Aurelia,
ashtu edhe familja nuk ishin dakord që ata të frekuentoheshin. Megjithatë, ai vazhdoi
ta kontaktonte e u mundua ta bënte për vete me idetë e Marksit e të Engelsit, por
nëna ime u largua edhe më tepër prej tij. U martua me tim atë, Giuseppe Terrusi, që
në atë kohë, ishte drejtor i Bankës së Vlorës. Familja jetoi në Shqipëri e im atë
mbrojti paratë e bankës nga gjermanët, xhaxhai luante futboll në kombëtaren e Shqipërisë,
ndërsa gjyshi ndërtonte ura. Pavarësisht nga kjo, ne, si familje u riatdhesuam në
Itali në vitin 1949, ndërsa im atë u arrestua dhe vdiq në vitin 1952 në burgun e Burrelit.
U akuzua se ishte fashist, por kishte vetëm pasaportën me vulën e fashos, sepse përndryshe
nuk mund të qarkullonte; u akuzua se ua dha paratë e bankës gjermanëve, por e vërteta
është krejt ndryshe, ai i ruajti ato dhe ua dorëzoi shqiptarëve; u akuzua se rekrutonte
shqiptarë për t’i çuar të luftonin në Itali, por edhe kjo nuk është e vërtetë. Nëna
ime, Aurelia u mundua të kontaktonte mikun e rinisë për t’i kërkuar drejtësi për tim
atë, por Enver Hoxha nuk e priti dhe i çoi fjalë se nuk mund të bënte asgjë, pasi
për shkak të pozicionit që kishte, do të interpretohej si lëshim. Unë nuk e di ku
është varri i tim eti. Di se ndodhet brenda burgut të Burrelit, ku vdiq nga zemra,
pasi vuajti pa faj, prandaj i bëj thirrje qeverisë shqiptare të bëjë ç’është e mundur
për t’i dhënë atij dhe të gjithë të humburve në Burrel, një varr të vërtetë.
Në
paraqitjen e librit, moderuar nga drejtoresha e gazetës “Shqiptari i Italisë”, Keti
Biçoku, morën pjesë edhe presidenti i shoqatës “Syri i Kaltër”, ish-ambasadori italian
në Shqipëri, Mario Bova, ambasadori i Shqipërisë në Itali, Neritan Ceka, përfaqësuesi
i bashkësisë shqiptare në komunën e Romës, Edmond Godo, kryetari i shoqatës së ish-të
përndjekurve në Shqipëri, Simon Mirakaj dhe Eugjen Merlika. Duke bërë tonën thirrjen
e Aldo Terrusit për gjetjen e varrit të të atit, e pyetëm ambasadorin Ceka ç’mund
të bëjë qeveria shqiptare….
Cila është
gjendja aktuale e ish-të përndjekurve? Cilat janë statistikat? Në mikrofonin tonë,
kryetari i shoqatës së ish-të përndjekurve politikë në Shqipëri, Simon Mirakaj…
Në vitin 1993,
Papa Gjon Pali II i pati kërkuar popullit shqiptar të mos jetojë me të kaluarën, por
të mos e harrojë, që tmerre të tilla të mos ndodhin më. Një koment i Eugjen Merlikës,
nip i ish-kryeministrit Mustafa Kruja, dëshmitar i persekutimit komunist…