Sipas lajmeve të pakonfirmuara zyrtarisht, në fund të këtij muaji presidenti rus Vladimir
Putin do të vizitojë Vatikanin për të katërtën herë që nga viti 2000. Kohët e fundit
Moska zyrtare ka shprehur dëshirën për të arritur një marrëveshje me Selinë e Shenjtë,
pas më se njëzet vjetësh, gjatë të cilëve marrëdhëniet ndërmjet Republikës Federale
Ruse dhe Kreut të Kishës Katolike kanë qenë të luhatshme. Ardhja e një bariu nga
Bota e Re në Selinë e Shën Pjetrit është pritur mirë nga Patriarku i Moskës, i cili,
në mesazhin e urimeve, që i pati dërguar Papës Françesku, nuk ka ngurruar të theksojë
se Kisha Katolike dhe ajo Ortodokse gjenden përballë sfidave të përbashkëta. Duket
se me ardhjen e një Pape nga Jugu i botës është tejkaluar klima e nderë mes Vatikanit
e Moskës, që kishte lënë pas lufta e ftohtë. Para pak ditësh një kor i Sinodit
Rus dha një koncert në Vatikan, gjë që u kuptua si shtendosje e marrëdhënieve diplomatike
delikate ndërmjet Kishave. Vizita e Presidentit të Fundit të Bashkimit Sovjetik
Mihajl Gorbaçov në Vatikan në vitin 1989 shënoi rivendosjen e kontakteve ndërmjet
Romës së parë e Romës së tretë (siç quhet Moska), por themelimi, më pas, i katër dioqezave
katolike nga ana e Gjon Palit II e ka ngurtësuar qëndrimin e Patriarkanës Ortodokse
kundrejt Kishës Katolike. Kisha Ortodokse e ka akuzuar Kishën Katolike për qëndrime
proselitiste dhe e ka interpretuar përmendjen e të fshehtave të Fatimës nga Gjon Pali
II si kërcënim për kthimin me forcë të rusëve në katolicizëm. Kjo duket se është arsyeja
pse Moska ka miratuar ligje, në bazë të të cilave katolicizmi trajtohet ndryshe nga
fetë e tjera tradicionale dhe vihet përballë pengesave ligjore e burokratike, që e
bëjnë më të vështirë jetën e Kishës në Rusi. Pas zgjedhjes së Kardinalit Ratzinger
si pasardhës i Pjetrit, ka pasur shenja të ndrojtura të përafrimit ndërmjet dy kishave
dhe gjatë këtyre muajve të shërbesës së Papës Françesku këto shenja janë përforcuar.
Papa është lutur për Patrikun Kiril në festën e shën Cirilit, ndërsa Patriku ka lavdëruar
angazhimin social të Bergoglio-s, duke nënvizuar prejardhjen e tij argjentinase, dhe
ka bërë thirrje për t’u bashkuar në mbrojtjen e vlerave tradicionale të rrezikuara
nga mësymja e liberalizmit. Në prag të vizitës së mundshme të presidentit Putin
në Vatikan, Roma e Moska duken më pranë njëra-tjetrës.