ԱՄՆ պատրաստ է աստիճանաբար մեղմացնել Իրանի դէմ պատժամիջոցները
ԱՄՆ պատրաստ է աստիճանաբար մեղմացնել Իրանի դէմ պատժամիջոցները, եթէ Թեհրանը դադրեցնէ
իր միջուկային մշակումները: Այդ մասին յայտարարած է ԱՄՆ վարչակազմի ներկայացուցիչը, որ
ժամանած է Ժնեւ մասնակցելու Իրանի բանակացութիւններու նոր փուլին «վեցնեակ»-ի հետ, կը
հաղորդէ panarmenian.net-ը՝ վկայակոչելով ԻԹԱՐ-ԹԱՍՍ-ը: ԱՄՆ կառավարութեան ներկայացուցիչը
յայտնած է, որ Ուաշինկթըն մտադիր է համաձայնեցնել առաջին քայլը, սկզբնական ըմբռնման հասնիլ,
որ պիտի կասեցնէ Իրանի միջուկային ծրագրի յետագայ զարգացումը եւ առաջին անգամ վերջին
տասնամեակի մէջ պիտի ապահովէ անոր «նահանջը»: Ուաշինկթընի տեսակէտէն Իրանի այդ գործողութիւնները
պէտք է սահմանափակումներու կիրառում նախատեսեն ինչպէս ուրանի հարստացման աստիճանի վերաբերեալ,
այնպէս ալ հումքի քանակի, յստակեցուցած է ԱՄՆ վարչակազմի ներկայացուցիչը: Բացի այդ, ան
նշած է, որ ըստ ԱՄՆ-ի, այդ միջոցներու իրականացման համար հարկաւոր է միջազգային հսկողութիւն:
Ըստ ներկայացուցիչին, այդ քայլերը թոյլ կու տան լրացուցիչ ժամանակ ստանալ Իրանի խնդրի
կարգաւորման համար քաղաքական, դիւանագիտական ճանապարհով: Իր հերթին ԱՄՆ պատրաստ կ’ըլլայ
սահմանափակ ժամանակով կասեցնել պատժամիջոցներու գործողութիւնները, ըսած է Օպամայի վարչակազմի
ներկայացուցիչը` չմանրամասնելով միտքը: ԱՄՆ-ն կը մեղադրէ Իրանը հիւլէական զէնքի ստեղծման
ուղղութեամբ գաղտնի աշխատանք տանելուն մէջ: Թեհրանը կը յայտարարէ, որ ատիկա բացառապէս
խաղաղ նպատակներ կը հետապնդէ: Հոկտեմբեր 15-16-ին Ժնեւի մէջ վեցամսեայ ընդմիջումէ
ետք տեղի ունեցան բանակցութիւններ Իրանի ու միջազգային «վեցնեակ»-ի միջեւ: Այսպիսով,
«Վեցնեակ»-ի եւ Իրանի միջեւ առաջին խորհրդակցութիւններն են այն պահէն ի վեր, երբ 2013-ի
Օգոստոսին Հասան Ռոուհանին ստանձնեց Իրանի նախագահի պաշտօնը: Իրանի պատուիրակութիւնը
նոր առաջարկներ ներկայացուց միջուկային ծրագրի շուրջ տարաձայնութիւններու հարթեցման վերաբերեալ: