Papa: Zoti ka dobësi për atë, që e ka humbur rrugën e gëzohet kur kthehet në grigjë
Gëzimi i Zotit kur gjen delen e humbur e “dobësia e dashurisë” – siç e quajti Papa
Françesku – për të gjithë ata, që e kanë bjerrë udhën e drejtë: këto argumente ishin
në qendër të homelisë së Atit të Shenjtë, në meshën e mëngjesit, në Shtëpinë e Shën
Martës. Duke komentuar shembëlltyrën e deles së humbur dhe të monedhës së humbur,
Papa shpjegoi qëndrimin e skribëve e të farisejve, që shkandulloheshin nga veprimet
e Jezusit e mërmërisnin kundër Tij. Ky njeri, thoshin, është rrezik për të gjithë,
sepse ha drekë me publikanët, me mëkatarët, fyen Zotin për t’iu afruar njerëzve. Jezusi
i quan këto fjalë “muzikë e hipokrizisë” e u përgjigjet me një shembëlltyrë: “Mërmëritjes,
Ai i përgjigjet me një shembëlltyrë të gëzueshme. Katër herë, në këtë pjesë të vogël,
përmendet fjala gëzim e hare: tre herë gëzimi e një herë hareja. ‘E ju – duket sikur
thotë Jezusi – ju po shkandulloheni, por Ati im gëzohet’. Ky është mesazhi më i thellë:
gëzimi i Zotit, të cilit nuk i pëlqen të humbë, prandaj për të mos humbur, del nga
vetveteja e shkon për të kërkuar. Është Hyj, që kërkon: kërkon të gjithë ata, që janë
larguar prej Tij. Ashtu si bariu, që shkon të kërkojë delen e humbur”. Puna
e Zotit, nënvizoi Papa, është të kërkojë për t’i ftuar pastaj të gjithë në festën
e krishterimit, të mirët e të këqinjtë: “Ai nuk duron të humbasë asnjë nga
të vetët. E kjo do të jetë edhe lutja e Jezusit, të Enjten e Madhe: ‘ Atë, të mos
humbasë asnjë nga ata, që Ti m’i ke dhënë’. Është një Zot, që vihet në udhë për të
na kërkuar e ka një farë dobësie në dashurinë për ata që janë larguar më tepër, që
kanë humbur… Shkon e i kërkon. E si i kërkon? I kërkon deri në fund, si bariu që ecën
në errësirë, duke kërkuar, derisa gjen; ose si gruaja, e cila, kur humbet monedhën,
ndez llambën, fshin shtëpinë dhe e kërkon me kujdes. Kështu kërkon edhe Zoti. ‘Ky
është biri im e nuk e humbas, është imi! E nuk dua ta humbas!’ Ky është Ati ynë Qiellor:
gjithnjë na kërkon”. Pastaj, vazhdoi Papa Françesku, kur e gjen delen e humbur
e kthen në grigjë, pranë të tjerave e askush prej tyre nuk duhet ta përbuzë e ta kritikojë,
sepse Zoti i jep sërish dinjitetin brenda vathës. E kështu, Hyji gëzohet: “Gëzimi
i Zotit nuk është vdekja e mëkatarit, por jeta e tij: ky është gëzimi. Sa larg ishin
këta njerëz, që mërmërisnin kundër Jezusit, sa larg nga zemra e Zotit! Nuk e njihin
atë aspak. Besonin se ishin besimtarë të mëdhenj, se ishin ‘njerëz të mirë’ vetëm
kur respektonin rregullat, kur ishin të edukuar e nganjëherë edhe bënin gjoja se ishin
të edukuar, apo jo? Kjo është hipokrizia e mërmëritjes. Ndërsa gëzimi i Zotit Atë
vjen nga dashuria: Ai na do. ‘Po unë jam mëkatar, kam bërë këtë, e këtë, e këtë…’
‘Unë të dua njësoj e shkoj të të kërkoj kudo e të kthej në shtëpi’. Ky është Ati ynë.
Mendojeni këtë”.