Նախագահ Սերժ Սարգսեան երէկ ընդունեց ԵԱՀԿ-ի Մինսքի խմբակի համանախագահներ Իկոր Փոփովը
(Ռուսիա), Ճեյմս Ուորլիքը (Միացեալ Նահանգներ), Ժաք Ֆորը (Ֆրանսա) եւ ԵԱՀԿ-ի գործող նախագահի
անձնական ներկայացուցիչ Անճէյ Քասփրչիքը: Զրուցակիցները քննարկեցին Լեռնային Ղարաբաղի
տագնապի բանակցային հոլովոյթի ներկայ փուլին եւ հետագայ քայլերուն վերաբերող հարցեր: Ուորլիք.
«Տագնապի Լուծման Կարելիութիւն Կայ» ԵԱՀԿ-ի Մինսքի խմբակի ամերիկացի համանախագահ Ճէյմս
Ուորլիք ազրպէյճանական «Թրենտ» լրատու գործակալութեան ըսած է, որ ներկայիս Լեռնային Ղարաբաղի
տագնապը լուծելու կարելիութիւն ստեղծուած է, ինչ որ վերջին շրջանին չկար: «Միացեալ Նահանգներ
կը հաւատան այդ կարելիութեան», ըսած է Ուորլիք: Ըստ անոր, Ազրպէյճանի եւ Հայաստանի
մէջ տեղի ունեցած նախագահական ընտրութիւններէն ետք նախագահներու հանդիպման համար արդէն
համաձայնութիւն ձեռք բերուած է Իլհամ Ալիեւի հետ, եւ այժմ կը նախատեսուի խօսիլ Հայաստանի
նախագահ Սերժ Սարգսեանի հետ: Կը կարծեմ` երկու կողմերու ժողովուրդներն ալ արժանի են
խաղաղութեան եւ բարգաւաճման: Մենք պէտք է գտնենք միջոցը, եւ ատիկա այն պատճառն է, որուն
համար ես ստանձնեցի համանախագահի աշխատանքը: Ես կը կարծեմ, որ կարելի է գտնել խաղաղութեան
ուղին», ըսած է ան: Ըստ Ուորլիքի, ան պատրաստ է շրջան մեկնիլ քանի անգամ, որ անհրաժեշտ
պիտի ըլլայ խաղաղ լուծման հասնելու համար: Պատասխանելով երկու նախագահներու հանդիպման
մասին հարցումին` ան ըսած է, որ ատիկա կախեալ է պետութիւններու ղեկավարներէն: «Այդ որոշումը
միայն համանախագահները պիտի չկայացնեն: Սակայն մենք կը փորձենք ջանքեր գործադրել հանդիպումը
այս տարի կազմակերպելու համար», ըսած է ան: Ըստ ամերիկացի համանախագահին, ատիկա օգտակար
պիտի ըլլար, որպէսզի կապ հաստատուէր ամէնէն բարձր մակարդակով: «Մենք յոյս ունինք, որ
ատիկա պիտի յանգեցնէ իրական խաղաղ հոլովոյթի լուծման, որմէ պիտի օգտուին երկու պետութիւնները:
Մենք շատ դրական քննարկում ունեցած ենք Իլհամ Ալիեւի հետ: Եթէ կայ քաղաքական կամք` յառաջ
շարժելու համար, ապա մենք պատրաստ ենք օգնելու», ըսած է ան: Մինսքի խմբակի համանախագահները
կ՛ուզեն հետագայ բանակցութիւններու ծրագիրին շուրջ համաձայնիլ երկու նախագահներուն հետ:
«Շուրջ երկու տարի է` նախագահները չեն հանդիպած, եւ այդ երկու տարիներուն մենք չենք կրցած
գտնել յառաջ շարժելու ուղին: Մենք յոյս ունինք, որ նախագահները պիտի կարենան հանդիպիլ`
արդիւնաւէտ եւ կառուցողական քննարկումի համար, ինչ որ պիտի օգնէ յառաջընթացին», ըսած
է ան: Ըստ Ուորլիքի, ցանկալի պիտի ըլլար, որ կողմերը իրենք յայտարարէին, թէ կ՛ուզեն
բազմակողմ բանակցութիւններ վարել: «Մենք յոյս ունինք, որ նախագահները կարենան խօսիլ իրարու
հետ եւ լուծում գտնել` յառաջ շարժելու համար: Այժմ հոլովոյթը յառաջ չի շարժիր, սակայն
մենք պիտի ուզէինք յառաջընթաց` խաղաղ ճամբով», ըսած է ան: Խօսելով ղարաբաղեան տագնապի
լուծման սկզբունքներուն մասին` Ուորլիք ըսած է, որ ատիկա ինքնին այն է, ինչ որ երկու
նախագահները պէտք է քննարկեն: Պատասխանելով ԵԱՀԿ-ի Մինսքի խմբակին մէջ Ֆրանսան Եւրոպական
Միութեամբ փոխարինելու մասին հնչած առաջարկներու մասին հարցումին` Ուորլիք նշած է, որ
կողմերը կը շարունակեն հաւատալ Մինսքի խմբակի ծիրին մէջ խնդիրի լուծման: «Խնդիրը բանակցութիւններու
ձեւաչափը չէ, հարցը այն է, որ կողմերը քաղաքական կամք դրսեւորեն յառաջ շարժելու եւ լուծում
գտնելու համար: Ատիկա է այն, որ մենք պիտի ուզէինք յառաջիկայ շաբթուան ընթացքին հասկնալ»,
աւելցուցած է համանախագահը: