Ուրբաթ, 1 նոյեմբեր 2013-ի երեկոյեան ժամը 7:00-ին, Այնճարի «Ս. Զէյթլեան» կեդրոնի «Մովսէս
Տէր Գալուստեան» սրահին մէջ տեղի ունեցաւ շարժանկարի ցուցադրութիւն եւ զրոյց` կազմակերպութեամբ
Համազգայինի «Պ. Սեւակ» մասնաճիւղի վարչութեան: Վարչութեան անդամ Սեւան Ադամեան ներկայացուց
հայր Յարութիւն վրդ. Պզտիկեանի կենսագրութիւնը եւ անոր գեղանկարչական ու գրական գործերը: Հայր
Յարութիւն, որ վերջերս ժամանած է Փարիզէն, պատմական ակնարկով մը ներկայացուց հայ ժողովուրդի
հեթանոսական շրջանէն քրիստոնէութիւն փոխանցումը, որ կատարուեցաւ խաղաղ միջոցներով, հակառակ
Հայաստանի ունեցած զինուորական ուժին: Ան խօսեցաւ այն հայ կրօնաւորներուն եւ ժողովուրդին
մասին, որոնք իսլամացած են Օսմանեան պետութեան բռնագրաւումին ներքեւ` տուրքերու եւ բռնութեան
պատճառով: Հայաստանի եւ սփիւռքի մէջ գտնուող վարդապետարաններուն մասին խօսելով` ան
ըսաւ, թէ իւրաքանչիւր վանք ունէր յատկութիւն մը, հոն հարիւրաւոր աշակերտներ տարբեր շրջաններէ
գալով կը տիրապետէին տարբեր նիւթերու եւ մասնագիտութիւններու: Ան իր խօսքը եզրափակեց
ըսելով, որ պէտք է վանքերու եւ եկեղեցիներու նկատմամբ ունենանք յարգանք, որովհետեւ անոնք
կը խորհրդանշեն հայութեան ինքնութիւնը ներկայացնող առաքեալները: Վարդապետը անդրադարձաւ
միջնադարու հայկական համալսարաններուն, անոնց ունեցած մեծ դերակատարութեան, յատկապէս
Գլաձորի եւ Տաթեւի համալսարաններուն, ուր կ՛ուսանէին հարիւրաւոր աշակերտներ` հայկական
տարբեր շրջաններէ: Դասախօսութեան աւարտին ներկաները առիթը ունեցան հարցումներ ուղղելու
հայր Պզտիկեանի, ինչպէս նաեւ վայելելու անոր գեղանկարչական գործերը, որոնք դրուած էին
ցուցադրութեան: