Goditet me mortajë nunciatura në Damask. Imzot Zenari: asnjë i plagosur
Një predhë mortaje goditi sot paradite nunciaturën e Damaskut në Siri. Dinamika e
ngjarjes, në fjalët e vetë nuncit apostolik, imzot Mario Zenari: Ndodhi diçka
e paparashikuar, megjithëse këtu, çdo gjë mund të ndodhë. Po ngrihesha nga gjumi –
ishte ora 6.35 pak a shumë – kur dëgjova një shpërthim të madh e u hodha menjëherë
përtokë, duke shmangur dritaret, sepse e kemi provuar se nganjëherë nuk bie vetëm
një predhë, por dy e tre. Pas pak, më thirri këshilltari, pastaj edhe murgeshat e
më thanë se nunciatura ishte goditur me mortajë. Dolëm për të parë dëmet, të cilat,
fatmirësisht, janë të kufizuara: nuk ka të plagosur. Duhet të them se sikur predha
të ishte hedhur gjysëm ore më vonë, kur kremtoj Lutjet e Mëngjesit në një terracë
pranë vendit ku goditi mortaja, nuk di ç’do të kishte ndodhur. Po kështu, do të ishin
plagosur edhe punëtorët, që vijnë rreth orës 8-8.30. A u mor vesh nga erdhi
predha e kush e hodhi? Vështirë të thuhet. Këtu mbërriti menjëherë policia,
prandaj t’i lemë ekspertët të bëjnë punën e tyre. Fatkeqësisht, këto ngjarje janë
të përditshme: të shtunën, ranë dy-tre predha mortaje në kuvendin e etërve françeskanë
të Halebit; gjatë javëve të fundit, janë bombarduar lagjet e krishtera të Damaskut
e pikërisht dje, më njoftuan për këtë statistikë: nga fillimi i konfliktit në lagjen
popullore të Jaramana-s, janë hedhur 2.800 predha mortaje. Në këto raste, mendoj për
të gjithë ata fëmijë, që kanë frikë, që kanë hequr edhe më keq, kur u ka rënë shtëpia
mbi kokë, që janë detyruar të ikin, sepse fshati i tyre është shkatërruar… Këta të
vegjël nuk kanë të bëjnë aspak me konfliktin e megjithatë, mbajnë peshën më të madhe
të tij, sepse u hapen plagë më të thella. Duhet bërë ç’është e mundur që të mos frikësohen
më nga bombardimet, nga të shtënat, që të kthehen në fshatrat e tyre e të shkojnë
në shkollë normalisht.